«Qazaqstanda jasalǵan» tańbasy joǵary sapa belgisine aınalýy tıis - Bektenov
ASTANA. KAZINFORM – Búgin Úkimet otyrysynda Premer-mınıstr Oljas Bektenov otandyq ónimniń úlesin turaqty túrde arttyrýǵa qatysty mınıstrlikterge tapsyrma berdi.
- Memleket basshysynyń tapsyrmasy boıynsha elimizde otandyq óndirýshilerdi qoldaýdyń negizgi tetikteri iske qosyldy. Ulttyq jáne ınfraqurylymdyq jobalardy iske asyrý barysynda taýarlar men kórsetiletin qyzmetterdi satyp alý kezinde qazaqstandyq kásiporyndarǵa basymdyq beriledi. Salyq salasynda jáne memlekettik qoldaýdyń ózge de sharalary jańa óndiristerdi iske qosyp, qoldanystaǵy óndiristerdiń qýatyn keńeıtýge qolaıly jaǵdaı jasap otyr. Endi ishki naryqta otandyq ónimniń úlesin turaqty túrde arttyryp, qazaqstandyq taýarlardyń eksportyn keńeıtý qajet. Memlekettik qoldaý sharalaryna jedel qol jetkizip, taýarlardyń jergilikti shyǵý tegin rastaý maqsatynda Otandyq óndirýshilerdiń tizilimi jasaldy. Ol memlekettik jáne kvazımemlekettik satyp alý rásimderi kezinde adal kásipkerlerge basymdyq berilýin qamtamasyz etedi, - dedi O. Bektenov.
Onyń aıtýynsha, bıyl iske qosylǵan Ulttyq taýarlar katalogy taýarlardy naqty ýaqyt rejıminde qadaǵalaýǵa múmkindik beretin biryńǵaı tsıfrlyq júıeniń negizin qalady. Qabyldanyp jatqan sharalardyń barlyǵy básekege qabiletti otandyq óndiristi qurýǵa jáne damytýǵa baǵyttalǵan. Sýbsıdııalardan bastap, taýarlardy álemdik naryqqa ilgeriletýge deıingi mundaı tásildi álemniń barlyq damyǵan ekonomıkalary qoldanady.
- Biz de osy saıasatty ustanamyz. Óıtkeni onyń naqty nátıjesin kórip otyrmyz. Atap aıtqanda, Qazaqstan búginde ishki naryqty negizgi azyq-túlik taýarlarymen tolyq qamtamasyz etedi. Birinshi jartyjyldyqta óndiris kólemi shamamen 10%-ǵa ósti. Aýyl sharýashylyǵy ónimderiniń eksporty da turaqty ósip keledi. Buǵan ekonomıka salalaryn keshendi memlekettik qoldaýdyń nátıjesinde qol jetkizdik. Endigi mindet – ishki naryqty otandyq ónimmen tolyqtyrýdy jalǵastyryp, ótkizý naryqtaryn keńeıtý jáne qazaqstandyq taýarlardy syrtqy naryqtarda neǵurlym belsendi ilgeriletý. «Qazaqstanda jasalǵan» ulttyq tańbasy tutynýshylardyń senimi men joǵary sapa belgisine aınalýǵa tıis, - dedi Úkimet basshysy.
Buǵan deıin azyq-túlik boıynsha elde negizgi otandyq ónimder qanshalyqty qamtamasyz etilgenin jazǵan edik.
