Qazaqstanda jasalǵan: ishki óndiris ekonomıkaǵa qalaı serpin berip jatyr
ASTANA. KAZINFORM – Qazaqstanda óńdeýshi ónerkásipti damytý, agroónerkásiptik keshendi jańǵyrtý jáne otandyq óndirýshilerdi qoldaý baǵytyndaǵy memlekettik saıasat naqty nátıjesin berip otyr. Úkimettiń málimetinshe, qabyldanyp jatqan sharalar óndiris kólemin ulǵaıtyp, jańa jumys oryndaryn ashýǵa, eksportty arttyrýǵa jáne ishki naryqtaǵy baǵanyń turaqtylyǵyn qamtamasyz etýge múmkindik berýde, dep habarlaıdy Úkimet.
Memleket basshysynyń tapsyrmasyna sáıkes ekonomıkany ártaraptandyrý, joǵary deńgeıde óńdelgen ónim óndirý jáne qazaqstandyq taýar óndirýshilerdiń áleýetin arttyrý negizgi basymdyqtardyń birine aınalǵan.
– 2026 jyldyń alǵashqy alty aıynda jer qoınaýyn paıdalanýshylar men kvazımemlekettik sektor sýbektileri otandyq kásiporyndarmen jalpy somasy 466,1 mlrd teńgege ofteık-kelisimsharttar men uzaqmerzimdi sharttar jasasty. Sonymen qatar «Qazaqstandyq taýar óndirýshilerdiń tizilimi» tsıfrlyq júıesinde 6,6 myńnan astam kompanııa tirkelip, jalǵan óndirýshilerdi anyqtaý jáne naqty óndiristerdi qoldaý tetigi engizildi, – delingen Úkimettiń sholýynda.
Úkimet naqty sektordy qarjylandyrýdy kúsheıtý úshin «Báıterek» holdınginiń kapıtalyn 1 trln teńgege deıin ulǵaıtqan. Sonyń nátıjesinde kásipkerlikti qoldaýǵa arnalǵan jalpy qarjylyq múmkindik 8 trln teńgege jetip, onyń 4 trln teńgeden astamy ıgerilgen. Qoldaý alǵan 8 myńnan astam kásipkerlik sýbektisiniń 96%-yn shaǵyn jáne orta bıznes ókilderi quraıdy.
Óńdeýshi ónerkásipte bıylǵy alty aıdyń qorytyndysy boıynsha ósim 9,8%-dy qurady. Elde 18 arnaıy ekonomıkalyq aımaq, 67 ındýstrııalyq jáne 34 shaǵyn ónerkásiptik aımaq jumys istep tur. Prezıdenttik pýlǵa engizilgen 17 iri jobanyń aıasynda avtomobıl jasaý, metallýrgııa, munaı-gaz hımııasy jáne tústi metallýrgııa salalarynda jańa óndirister iske asyrylýda.
– 2026 jyly jalpy quny 1,7 trln teńgeni quraıtyn 200 ındýstrııalyq jobany iske asyrý josparlanǵan. Olar shamamen 18 myń turaqty jumys ornyn qurady. Jobalar tolyq qýatyna shyqqanda jyl saıyn 1,5 trln teńgeniń ónimin óndirip, onyń 500 mlrd teńgesi eksportqa baǵyttalady, – dep málimdedi Úkimet.
Agroónerkásiptik keshende de ınvestıtsııalyq belsendilik kúsheıgen. Bıylǵy alty aıda aýyl sharýashylyǵy óniminiń kólemi 4,4%-ǵa ósip, 2,2 trln teńgege jetti. Al aýyl sharýashylyǵyna salynǵan ınvestıtsııalar 36,4%-ǵa, azyq-túlik óndirisine baǵyttalǵan ınvestıtsııalar 2,7 esege artqan.
Sonymen qatar jalpy egis alqaby 23,8 mln gektarǵa deıin ulǵaıyp, maıly jáne jem-shóp daqyldarynyń kólemi kóbeıgen. Mal sharýashylyǵynda da oń ósim baıqalyp, iri qara, jylqy jáne túıe sany artqan. Et, sút jáne jumyrtqa óndirisi de ósý ústinde.
Aýyl sharýashylyǵy tehnıkasyn jańartý baǵytynda 5% mólsherlememen usynylatyn jeńildetilgen lızıng baǵdarlamasyna bólinetin qarjy 350 mlrd teńgege deıin ulǵaıtyldy. Qazirgi tańda Qazaqstanda traktorlar men kombaındarǵa degen ishki suranystyń 90%-yn qamtamasyz etetin 10 iri zaýyt jumys isteıdi.
– Qabyldanǵan sharalardyń nátıjesinde 2026 jyldyń birinshi jartyjyldyǵynda azyq-túlik óndirisiniń naqty kólem ındeksi 114,7%-dy qurady. Qazaqstan búginde negizgi azyq-túlik ónimderiniń 80-100%-yn óz óndirisi esebinen qamtamasyz etip otyr. Importqa táýeldi qus eti, balyq, shujyq ónimderi, irimshik, qant jáne alma óndirisin ulǵaıtý boıynsha jańa jobalar iske asyrylýda. Bul ishki naryqtaǵy baǵanyń turaqtylyǵyn saqtap, ımportqa táýeldilikti kezeń-kezeńimen azaıtýǵa múmkindik beredi, – delingen Úkimet aqparatynda.
Aıta keteıik, Qazaqstan ekonomıkasy jarty jylda 4,1%-ǵa ósti.
