Qazaqstanda jasalǵan «Robotoposhtashy» EKSPO aýmaǵynda jumys istemek
Roboposhtashy qazir EKSPO aýmaǵynda ornalasqan keńselerge aldyn-ala belgilengen baǵdar arqyly hat-habarlaryn jetkizip júr. Jańa tehnıkany jasaǵan «Cleverest technologies» kompanııasynyń dırektory, robottehnık Baýyrjan Ospannyń aıtýynsha, bınokýlıarly kórý, tereńdikti sezine bilýdiń lazerlik qabiletteri, ýltradybysty sensorlar - robotoposhtashy eshkimdi qaǵyp ketpeı nemese eshbir zatty búldirmeı avtomatty rejımde A núktesinen B núktesine hat-habardyń jetkizilýin qamtamasyz etetinin aıtady.
«Berik ınterfeıs pen avtomatty qulyptar Qazposhta klıentteriniń júkterin nemese hat-habarlaryn saqtaýda taptyrmaıdy. Eń birinshi kezekte Qazposhta qyzmetkeri ınterfeıske jaqyndap, robotoposhtashynyń uıashyǵyn tańdaýy kerek. Sodan keıin robotoposhtashynyń betindegi ekranǵa klıent týraly málimet engiziledi. Uıashyqty japqannan keıin tek klıentke málim kilt sózdi jáne mekenjaıdy engizip, ekrandaǵy «qabyldaý» túımeshesi basylady. Osydan keıin robotoposhtashy klıentke hat-habardy jetkizýge jolǵa shyǵyp ketedi», - deıdi ol.
Baýyrjan Ospannyń sózine sensek, qulyp temirden jasalǵandyqtan, ony ashý ońaı sharýa emes. Robotoposhtashynyń uıashyqtaryna standartty júkter ǵana sııady. Hat-habar belgilengen jerge jetken kezde klıenttiń uıaly telefonyna SMS-habarlama keledi. SMS-habarlamadaǵy kilt sóz engizilgennen keıin klıent óziniń hat-habaryn alyp kete alady.
«Qazirgi ýaqytta robotoposhtashy pılotty rejımde EKSPO aýmaǵynyń ishinde hat-habar jetkizip, synaqtan ótýde. Turǵyndardyń páterine deıin tehnıka júkti aparyp bermeıdi. Belgili bir núktelerge ǵana, máselen bıznes-ortalyqtarǵa hat-habarlardy jetkizedi. Meken-jaı boıynsha málimetter retke keltirilmegendikten, robotoposhtashy Astananyń kóshelerine áli jiberilmeıdi. Ázirge synaqtan ótkizemiz», - deıdi robottehnık.
Eske sala ketsek, búgin Astanadaǵy EKSPO aýmaǵynda Qazposhtanyń robopost keńsesi ashylǵan bolatyn.
