«Qazaqstanda jasalǵan» ónim nemis sapasyna saı bolýy kerek — Toqaev
ASTANA. KAZINFORM — Prezıdent Qasym-Jomart Toqaev Qazaqstanda Bavarııa tehnologııasyn engizip, nemis sapasyna saı ónim óndirýdi qazaq-german ekonomıkalyq yntymaqtastyǵynyń basym baǵyty retinde atady. Bul týraly Aqorda málim etti.
Prezıdent elimizde Bavarııanyń jetekshi kompanııalary, sonyń ishinde Siemens, Siemens Energy, Knauf, Horsch jáne basqa da kásiporyndary tabysty jumys istep jatqanyn atap ótti. Memleket basshysynyń pikirinshe, qazaq-german ekonomıkalyq qarym-qatynasynyń kelesi kezeńi ozyq tehnologııalarmen, joǵary tehnologııalyq óndirispen jáne jańa naryqtardy birlese ıgerýmen baılanysty bolýǵa tıis. Bul rette Qasym-Jomart Toqaev bavarııalyq kompanııa jetekshilerine elimizde ınvestorlarǵa jasalyp jatqan qolaıly jaǵdaı, atap aıtqanda, Úkimet janyndaǵy Investıtsııalyq shtab pen Astana halyqaralyq qarjy ortalyǵy týraly keńinen maǵlumat berdi. Sodan keıin Prezıdent ózara tıimdi seriktestiktiń negizgi baǵyttaryna toqtaldy.
— Ozyq óndiristi damytý negizgi basymdyqtardyń biri bolǵany abzal. Qazaqstan mashına jasaý, metallýrgııa, elektr tehnıkasy jáne qosalqy bólshekter óndirisin damytýdy qolǵa aldy. Áıtse de eńbek ónimdiligin odan ári arttyrý úshin óndiristi avtomattandyryp, robotty tehnıka men ozyq tehnologııalardy keńinen paıdalaný qajet. Siemens jáne KUKA sekildi kompanııalar atalǵan salalarda kóshbasshy sanalady. Qazaqstannyń iri kásiporyndary, sonyń ishinde Qarmet te bar, ónerkásip salasyndaǵy turaqty suranys pen senimdi seriktestik baılanystardy qamtamasyz ete alady. Órshil maqsattarymyzdy «Qazaqstanda Bavarııa tehnologııasy arqyly nemis sapasyna saı jasalǵan»degen qarapaıym sózben beıneleýge bolady, — dedi Memleket basshysy.
Prezıdent asa mańyzdy materıaldardy seriktestiktiń taǵy bir baǵyty retinde atady.
— Nemis ónerkásibi mańyzdy resýrstardyń jetkizilý joldary senimdi jáne ár taraptan bolýyna múddeli. Qazaqstan bul oraıda mys, tıtan, alıýmınıı, berılıı, tantal, nıobıı sekildi elementtermen uzaq ýaqyt boıy qamtamasyz ete alady, — dedi Memleket basshysy.
