Qazaqstanda jasalǵan ónimder álemniń 110 eline eksporttalady

ASTANA. QazAqparat - Qazaqstanda óndiriletin ónimder álemniń 110 eline eksporttalady. Bul týraly búgin Astanada ótken «Qazaqstan Respýblıkasy ındýstrııalyq-ınnovatsııalyq damytýdyń 2015-2019 jyldarǵa arnalǵan memleketik baǵdalamasynyń iske asyrylýy týraly» partııalyq tyńdaýlary barysynda QR Investıtsııalar jáne damý mınıstri Jeńis Qasymbek málim etti, dep habarlaıdy «QazAqparat» HAA tilshisi.

«Búgingi tańda óńdeýshi ónerkásiptiń qazaqstandyq ónimderi 110 elge eksporttalyp jatyr. Keıbir taýar pozıtsııasy boıynsha ótkizýdiń tyń naryǵy ashylǵan. Alǵashqy alty aıda «Azııa-avto» kompanııasy óndiretin avtokóliktiń 672-i Qytaı men BAÁ-ge jóneltildi. Qytaılyq áriptestermen birlese qurastyrylǵan Qostanaıdaǵy avtokólikter Tájikstanǵa eksporttala bastady. Aýyl sharýashylyǵy tehnıkasy tuńǵysh ret Reseı naryǵyna jol tartty. Lokomotıvter eksporty Tájikstan men Ázerbaıjan eline de jolǵa qoıylyp, 40-qa jýyq lokomotıvti ótkizdik. Bul tizimdi odan ary da jalǵastyra berýge bolady», - deıdi mınıstr.

Jeńis Qasymbektiń aıtýynsha, óńdeletin ónerkásip ónimderiniń mólsheri aǵymdaǵy jyldyń qańtary men shildesi aralyǵynda 8,7 mlrd teńgeni quraǵan. Bul kórsetkish ótken jylǵymen salystyrǵanda 27 paıyzǵa artyq. Sonymen qatar, mınıstr óńdeýshi sektordyń úlesi 7 aı boıynsha 32,7 paıyzǵa artqanyn atap ótti.

«Óńdeýshi  sektorda básekege qabilettilik artyp keledi. Osylaısha, 2010-2016 jyldar aralyǵynda óńdeýshi ónerkásip salasynda orta jáne iri kásiporyndar boıynsha eńbek ónimdiligi eki esege ósip, jan basyna shaqqanda 38,9 myń AQSh dollaryna jetti», - dedi mınıstr.

Vedomstvo basshysy sonymen qatar, ındýstrııalyq damý baǵdarlamasynyń arqasynda jaly ekonomıka men ónerkásiptiń qurylymy ózgerip kele jatqanyn aıtyp ótti.

«Óńdeýshi sektordyń el ekonomıkasynyń damýyndaǵy úlesi 2010 jyly 11,3 paıyzǵa, 2017 jyldyń 7 aıynyń kórsetkishi boıynsha 12 paıyzǵa jetti. Bul degenińiz, ındýstrıalandyrý baǵdarlamasy, shynynda da, Qazaqstannyń ekonomıkasyna áserin tıgizetinin kórsetip otyr. Óńdeýshi ónerkásiptiń úlesi 2010 jyly 30,5 paıyzǵa, 2017 jylydń 7 aıy boıynsha 41,1 paıyzǵa ósti», - dep túıdi mınıstr.