Qazaqstanda jasalǵan myńnan asa jedel járdem kóligi paıdalanýǵa beriledi

NUR-SULTAN. QazAqparat – Osy jyldyń qarasha aıyna deıin eldegi aýrýhanalar men emhanalar úshin myńnan asa otandyq óndiristegi jedel járdem kóligi satylyp alynady. Bul týraly Densaýlyq saqtaý mınıstri Alekseı Tsoı málim etti, dep habarlaıdy QazAqparat tilshisi.

«Bizdiń mınıstrlik kúzgi kezeńge barynsha daıyndyq jumystaryn júrgizip jatyr. Eldegi aýrýhanalardaǵy tósek oryndardyń sany 54 178-ke jetedi. Bul degenimiz – qazir qoldanystaǵy 16 304 ınfektsııalyq tósek oryn, jańadan salynyp jatqan ınfektsııalyq nysandaǵy 2790 jańa tósek oryn men basqa statsıonarlardaǵy 32 064 tósek oryn. Jan saqtaý bólimindegi tósek oryndardyń sany 2981-ge jetkiziledi. 2020 jyldyń 9 qyrkúıegindegi jaǵdaı boıynsha respýblıkada 19 066 ınfektsııalyq tósek oryn bolsa, onyń 15 paıyzynda patsıentter jatyr», - dedi Alekseı Tsoı Úkimet otyrysynda.

Mınıstrdiń aıtýynsha búgingi tańda ınfektsııalyq jáne provızorlyq statsıonarlarda ókpeni jasandy jeldetýdiń 3379 apparaty bar. Qosymsha taǵy 2619 apparat satylyp alynǵaly jatyr. Onyń ishinde 1500 apparat otandyq kompanııalarda óndirilgen.

«Jedel járdem qyzmeti týraly aıtar bolsaq, 2020 jyly otandyq óndiristegi 1167 dana sanıtarııalyq avtokólikti satyp alý kózdelip otyr. Olardyń bári de osy jyldyń qarasha aıyna deıin (aýrýhanalarǵa) jetkiziledi», - dedi ol.