«Qazaqstanda jasalǵan» - Astanada úsh kún boıy otandyq ónimder kórmesi ótedi
ASTANA. KAZINFORM — EXPO Halyqaralyq kórme ortalyǵynda «Ulttyq ónim» VIII otandyq óndirýshiler kórmesi bastaldy. Úsh kún boıy kórmede Qazaqstannyń barlyq óńirinen 350 óndirýshi qatysyp, óz ónimderin usynady.
2015 jyldan beri «Damý» qory qazaqstandyq óndirýshiler kórmesin uıymdastyryp keledi. Onda memleketten qoldaý alǵan shaǵyn jáne orta bıznes sýbektileriniń taýarlary, tamaq, qurylys, jıhaz, kıim, arnaıy tehnıka men jabdyqtar, kádesyı jáne polıgrafııa ónimderi usynylyp, otandyq kompanııalar arasyndaǵy kooperatsııany keńeıtý jáne óndiristiń jańa tehnologııalaryn engizý kózdelgen.
− Ulttyq ónim segizinshi kórmesi – otandyq kásipkerlikti damytýdyń eń jaqsy dáleli men kórinisi. Óndirýshiler elimizdiń ishki naryǵyndaǵy ustanymyn nyǵaıtyp, eksportqa shyǵyp jatyr. Shetelde tanymal brendke aınalyp jatyr. Al shaǵyn jáne orta bıznesti memlekettiń qoldaýy tek kúsheıe bermek. Bıyl ekonomıkanyń naqty sektoryn jedel damytýǵa bet burdyq. Memleket aqparattyq tehnologııa, logıstıka, týrızmge, tamaq ónimin, qurylys materıalyn óndirýge, mashına jasaý, jeńil jáne hımııa ónerkásibi sııaqty basym salalardaǵy ShOB ınvestıtsııalyq jobalaryna ashyq tapsyrys jarııalady. Bul baǵytta jan-jaqty qoldaý kórsetiledi, - dedi Premer-mınıstrdiń orynbasary – Ulttyq ekonomıka mınıstri Serik Jumanǵarın kórmeniń ashylýynda.
Kórmede taǵam ónimderi, jeńil jáne hımııa ónerkásibinen bastap, mashına jasaý, qural-jabdyqtar men zergerlik buıymdarǵa deıin ártúrli ónim túrleri usynylǵan. Olardyń qatarynda «Gormolzavod», «Aq Dam» ulttyq táttileri, Galamilk, Altay Outwear belsendi demalys pen týrızmge arnalǵan kıim-keshek, «Balausa Jewelry» zergerlik buıymdary sekildi tanymal brendter bar.
Sonymen birge, as úı plıtalary, jeldetkish, medıtsınalyq jabdyqtar, transformatorlar, qospa jem, shabadandar, toqyma buıymdary, qurylys materıaldary, antıseptıkter, kıim, aıaq kıim jáne basqa da suranysqa ıe taýarlar usynylǵan.
Ótken jyly el Úkimeti Ulttyq ekonomıka mınıstrliginiń jáne «Báıterek» holdınginiń belsendi qatysýymen sýbsıdııalaý jáne kepildik berý quraldary arqyly bıznesti qoldaý baǵdarlamalaryna 336 mlrd teńge bóldi. Jalpy nesıe somasy 1,7 trln teńgege 29,5 myń joba memleket qoldaýyn aldy. Onyń ishinde 2,7 myń joba jeńildikpen 254 mlrd teńge nesıe alǵan.
Bul sharalar 9,7 myń jumys ornyn qurýǵa, 25,4 trln teńge somasyna ónim shyǵarýǵa jáne 1,7 trln teńge salyq túsimin qamtamasyz etýge múmkindik berdi. Nátıjesinde 2024 jyly halyq sanynyń 48% ShOB sektorynda jumyspen qamtylǵandar qatarynda boldy, al eldiń jalpy ishki ónimine qosqan úlesi shamamen 40% kórsetti.
«Báıterek» holdınginiń basqarma tóraǵasy Rýstam Qaraǵoıshın ekonomıkalyq ósimdi yntalandyrý, ásirese ekonomıkanyń naqty sektoryn qoldaý men bıznestiń qarjylǵa qoljetimdigin arttyrý maqsatyndaǵy sharalardyń mańyzyn aıtty.
− Otandyq óndiristi qoldaý – «Báıterek» holdınginiń strategııalyq basymdyǵy. Biz qazaqstandyq bıznestiń ulttyq ekonomıkanyń tiregi, ınnovatsııalar men jumyspen qamtý kózi ekenine senimdimiz. Bul kórme – qazaqstandyq óndirýshilerdiń el damýyndaǵy basty rólin kórsetý. Biz olardyń turaqty ósýine jáne kásipkerlik áleýetin ashýǵa jaǵdaı jasaı otyryp, únemi janynda bolýǵa tyrysamyz, - dedi Rýstam Qaraǵoıshın.
Kórme aıasynda otandyq kásipkerlikti damytý máselelerine arnalǵan paneldik sessııalar ótti. Olarǵa jetekshi qazaqstandyq jáne halyqaralyq sarapshylar qatysady. Qatysýshylar elimizdegi bıznesti damytýdaǵy ózekti trendterdi, syn-qaterler men múmkindikterdi talqylaıdy.
Sonymen qatar kórme barysynda «Halyq tańdaýy» atty táýelsiz dám baıqaýy, áıelder men erler kıim toptamalarynyń kórsetilimi, kásipkerlerden sheberlik sabaqtary, kórme qatysýshylarynan kún saıyn syılyqtar utysy jáne kontserttik baǵdarlama ótedi.
Jalpy «Damý» qorynyń quraldary arqyly 225,3 myń jobaǵa memlekettik qoldaý kórsetilip, 14,1 trln teńge kóleminde nesıe berilgen. Nátıjesinde 210 myńnan astam jańa jumys orny qurylyp, 1,2 mln-nan astam jumys orny saqtalǵan, 104,5 trln teńgeniń ónimi óndirilip, 7,3 trln teńge salyq túsimi qamtamasyz etilgen.
Sáýir aıynda Senat otandyq óndirýshilerdi qorǵaýǵa baǵyttalǵan qujatty maquldaǵan edi.