Qazaqstanda jasalatyn asa aýyr qylmystar sany 15 paıyzǵa azaıdy
ASTANA. 13 qańtar. QazAqparat - Qazaqstandaǵy krımınaldyq jaǵdaı qalypty, jasalatyn qylmystar sany qysqaryp keledi.
Búgin Parlament Májilisinde ótip jatqan Úkimet saǵatynda QR Іshki ister mınıstri Qalmuhanbet Qasymov osylaı málimdedi.
Mınıstrdiń sózine qaraǵanda, asa aýyr qylmystar sany on bes paıyzǵa azaıyp, 2394-ti quraǵan. Sonymen qatar, byltyrǵy jyly kisi óltirý qylmysy 12 paıyzǵa qysqaryp, 1118-ge deıin tómendese, tonaýlar 7 paıyzǵa kemip, 18,8 myńdy, al qaraqshylyq qylmysy 18 paıyzǵa azaıyp, 1358-ti quraǵan. Kámeletke tolmaǵandar arasyndaǵy qylmys 8 paıyzǵa, al qarý qoldana otyryp jasalǵan qylmystar 11 paıyzǵa tómendedi.
«Jalpy qylmystyń statıstıkalyq ósýi negizinen ortasha jáne aýyrlyǵy ortasha qylmystardyń esebinen bolyp otyr. Sonyń ishinde, ásirese, urlyq qylmysy ósýde. Degenmen, bunyń ózi qylmystardy tirkeý salasyndaǵy saıasattyń ózgeristerinen kóringen nátıje bolyp tabylady», - deıdi Q. Qasymov.
Onyń sózine qaraǵanda, byltyr elimizde jasalǵan urlyqtar sany 18 paıyzǵa artyp, 210,1 myńǵa taqasa, alaıaqtyq qylmystar sany 60 paıyzǵa deıin joǵarylaǵan jáne 34,9 myńǵa jetti. Al buzaqylyq 73 paıyzǵa ósip, 30 myńǵa tarta qylmystar tirkelgen.
