Qazaqstanda jas jýrnalısterge arnalǵan tsıfrlyq platforma iske qosyldy
ASTANA. KAZINFORM – Qazaqstanda balalar men jasóspirimderge arnalǵan ulandigital.kz tsıfrlyq platformasy iske qosyldy, dep habarlaıdy Kazinform.
Jańa jobany 96 jyldyq tarıhy bar respýblıkalyq «Ulan» gazeti usyndy. Platforma balalarǵa ulttyq kontentti qoljetimdi etip, jas avtorlardyń shyǵarmashylyǵyn damytýǵa baǵyttalǵan.
– Jańa saıt oqýshylarǵa materıal oqýmen qatar, óz kontentin ázirleýge de múmkindik beredi. «Hat jazamyn» bólimi arqyly jas avtorlar maqalalaryn, óleńderin jáne basqa da shyǵarmashylyq jumystaryn redaktsııaǵa birneshe mınýt ishinde joldaı alady. Aı saıyn belsendi qatysýshylar arasynan úzdik tilshi anyqtalady, – delingen habarlamada.
Platformada balalarǵa jýrnalıstıka negizderin túsindiretin medıa mektep qarastyrylǵan. Onda oqýshylar aqparatpen jumys isteýdi, materıal daıyndaýdy jáne kásibı etıka qaǵıdalaryn meńgeredi.
Sondaı-aq «Erjettim… Boıjettim…» aıdary jasóspirimdermen ashyq ári senimdi baılanys ornatýǵa arnalǵan. Bul bólimge jiberilgen ár hat jeke qaralady jáne jarııalanbaıdy.
Tsıfrlyq platforma tolyq qazaq tilinde ázirlengen. Balalarǵa arnalǵan qaýipsiz orta retinde saıtta syrtqy jarnama ornalastyrylmaǵan.
Paıdalanýshylar redaktsııa týraly aqparat alyp, tikeleı baılanys ornata alady. Sonymen qatar gazettiń baspa jáne PDF nusqasyna jazylý múmkindigi bar.
Aıta keteıik, bıyl alǵash ret óńirlik jýrnalısterge de páter kilti tabystalady.
