Qazaqstanda jas jubaılarǵa nekege deıin keńes berý ortalyqtary jumys isteıdi
ASTANA. KAZINFORM – Qazaqstanda Otbasyn qoldaý ortalyqtary jas jubaılarǵa berik otbasy qurýǵa baǵyttalǵan nekege deıingi keńes berý jumystaryn júrgizip jatyr.
QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń qoldaýymen ortalyq mamandary jastarǵa ózara túsinistikke, syılastyq pen jaýapkershilikke negizdelgen otbasy qurý máseleleri boıynsha keńes beredi.
Otbasy qundylyqtaryn nyǵaıtý jáne balalardyń quqyqtaryn qorǵaý máseleleri Memleket basshysynyń aıryqsha nazarynda. Óıtkeni qoǵamnyń turaqtylyǵy men ál-aýqaty ár otbasyndaǵy tatýlyqtan bastalady.
– Búginde elimizde azamattarǵa tegin quqyqtyq, psıhologııalyq jáne áleýmettik kómek kórsetetin 160 Otbasyn qoldaý ortalyǵy jumys isteıdi. Óńirlerde mundaı ortalyqtar barlyq qala men aýdandy qamtyǵan. Al Astana, Almaty jáne Shymkent qalalarynda biryńǵaı qalalyq ortalyqtar qyzmet kórsetedi, – dep habarlady Ulttyq komıssııadan.
Jyl basynan beri ortalyqtarǵa 30 myńǵa jýyq ótinish túsken. 24 myńnan astam otbasyǵa keńes berilip, taǵy 5 myńǵa jýyq otbasy turaqty áleýmettik qoldaýǵa alynǵan.
Ortalyqtar árbir otbasyǵa alǵashqy ótinishten bastap másele tolyq sheshilgenge deıin jan-jaqty kómek kórsetedi. Sonymen qatar mamandar otbasyndaǵy qıyndyqtardy erte anyqtaý úshin mobıldi toptarmen jumys isteıdi.
– «FSM Social» tsıfrlyq júıesi ótinishterdi jedel tirkeýge jáne jaýapty memlekettik organdardyń birlese áreket etýine múmkindik beredi. Mundaı júıeli qoldaý otbasylarǵa qajetti kómekti der kezinde kórsetýge jáne árbir qazaqstandyq shańyraqtyń keleshegin nyǵaıtýǵa baǵyttalǵan, – dep atap ótti komıssııadan.
Aıta keteıik, nekege májbúrleý boıynsha 19 is sotqa jetti.
