Qazaqstanda jas talanttarǵa jol ashatyn 20 kreatıvti hab jumys isteıdi
ASTANA. KAZINFORM — Astanada Mádenıet jáne aqparat mınıstri Arman Qyryqbaev jastarmen jáne kreatıvti ındýstrııa ókilderimen kezdesti. Jıynda Memleket basshysy Qasym-Jomart Toqaevtyń Qazaqstan halqyna Joldaýy men negizgi bastamalary sóz boldy.
Mádenıet jáne aqparat mınıstrliginiń baspasóz qyzmeti málim etkendeı, kezdesýge jas kásipkerler, dızaınerler, mýzykanttar, rejısserler, prodıýserler, blogerler, jýrnalıster, ǵalymdar, zertteýshiler men sportshylar qatysty. Sondaı-aq «Daryn» memlekettik jastar syılyǵynyń laýreattary, «Táýelsizdik urpaqtary» grantynyń ıegerleri, jastar uıymdary men volonterlik qozǵalys kóshbasshylary jáne stýdentter jınaldy.
Mınıstr Joldaýda aıqyndalǵan negizgi mindetterge keńinen toqtalyp, memlekettik jastar saıasatynyń basym baǵyttaryn atap ótti.
Іs-sharada shyǵarmashyl jastardy qoldaý, olarǵa bilim berý, kásibı biligin jetildirý, tsıfrlandyrý, jasandy ıntellekt jáne kreatıvti ındýstrııalardy damytý máseleleri talqylandy. Memlekettik saıasattyń bul mańyzdy baǵyttary Memleket basshysynyń Joldaýynda da qamtylǵan.
— Memleket basshysynyń bıylǵy Joldaýy — elimizdiń aldaǵy damý baǵdaryn aıqyndaıtyn, jańa mindetter men múmkindikterdi belgileıtin mańyzdy strategııalyq qujat. Prezıdent keler urpaqqa qýatty ekonomıka men damyǵan tehnologııalary bar memleket qaldyrý mindetin atap ótti. Bul jastarǵa jasalyp jatqan múmkindiktermen qatar, olardyń el bolashaǵy aldyndaǵy jaýapkershiligin de aıqyndaıdy, — dedi Arman Qyryqbaev.
Mınıstr bilimdi, oı-órisi keń urpaq tárbıeleýdiń jáne kitap oqý mádenıetin qalyptastyrýdyń mańyzyn aıtty. Óz sózinde ol Memleket basshysynyń kitap oqıtyn ult qalyptastyrý baǵytyndaǵy bastamasyna arnaıy toqtaldy. Osy baǵytta 2026 jylǵy 1 qyrkúıekten bastap «Kitap oqıtyn ult» respýblıkalyq marafony ótip jatyr.
Arman Qyryqbaev memlekettik qoldaý sharalary jastardyń óz bastamalaryn qolǵa alyp, kásibı biligin jetildirýine múmkindik beretinin jetkizdi. Atap aıtqanda, «Táýelsizdik urpaqtary» granty aıasynda jyl saıyn 30 jasqa 3 mıllıon teńgeden qarjylaı qoldaý kórsetiledi.
Kezdesýde jastardyń ekonomıkanyń jańa baǵyttarynda óz ornyn tabý múmkindikterine de erekshe kóńil bólindi. Mınıstr tsıfrlyq tehnologııalar men jasandy ıntellekt ekonomıkanyń barlyq derlik salasyn, sonyń ishinde mádenıet pen aqparat salasyn damytýdyń mańyzdy quraldaryna aınalyp kele jatqanyn aıryqsha atap ótti.
Jıynda kreatıvti ekonomıkany damytý máselesi de jeke qaraldy. Búginde elimizdiń barlyq 20 óńirinde jas talanttardyń qabiletin ashýǵa, óz jobalaryn bastaýǵa jáne otandyq ónimderdi tanytýǵa jaǵdaı jasaıtyn kreatıvti habtar jumys isteıdi.
Qatysýshylar ulttyq mádenıetti damytý, otandyq avtorlardy qoldaý, qoǵamdyq qundylyqtardy nyǵaıtý jáne jańa ádep qaǵıdalaryn qalyptastyrý jóninde pikir almasty. Osy oraıda jaýapkershilik, adaldyq, zańǵa qurmet jáne qorshaǵan ortaǵa uqypty túrde qaraý mádenıetin ornyqtyrýǵa baǵyttalǵan «Adal azamat», «Zań men tártip» jáne «Taza Qazaqstan» qaǵıdattary sóz boldy.
Mınıstr qoǵamdaǵy ózgeristerge jastardyń qatysýy mańyzdy ekenin atady. Onyń aıtýynsha, zamanaýı bilim men tehnologııalardy meńgerý qabileti ulttyq qundylyqtarǵa adaldyqpen, jaýapkershilikpen jáne belsendi azamattyq ustanymmen ushtasýy tıis.
Jastar Memleket basshysynyń bastamalaryn qoldaıtynyn bildirip, olardy oryndaý maqsatynda belsendi qatysýǵa, eldiń damýyna jáne qoǵamdaǵy oń ózgeristerge úles qosýǵa daıyn ekenin jetkizdi.
Kezdesý ashyq dıalog túrinde jalǵasty. Jastar mınıstrge óz saýalyn qoıyp, birqatar bastamasyn usyndy. Sonymen qatar el aldyndaǵy mańyzdy mindetterdi atqarýdaǵy jastardyń róli sóz boldy.
Buǵan deıin Batys Qazaqstan oblysynda Prezıdent Joldaýyn iske asyrý máseleleri talqylanǵanyn jazǵanbyz.
