Qazaqstanda jas maman mártebesi anyqtalady
ASTANA. 25 shilde. QazAqparat - Qazaqstanda jas maman mártebesin anyqtaý jónindegi jumystar júrgizilýde, dep habarlady QR Bilim jáne ǵylym mınıstrligi Jastar saıasaty departamentiniń dırektory Madııar Qojahmet pm.kz saıtyna bergen suhbatynda.
«Biz jas maman mártebesi men ony qoldaý normalaryn anyqtaýdy josparlaýdamyz, depýtattarmen birge talqylaý úshin birneshe usynystar men nusqalar daıyndalyp ta qoıyldy», - deıdi M.Qojahmet.
Jastar saıasaty departamentiniń basshysy búgingi kúni joǵarǵy oqý ornyn bitirgen, jáne óz mamandyǵy nemese soǵan uqsas basqa mamandyq boıynsha 3 jyl boıy jumys isteıtin jas azamat jas maman bolyp esepteletinin aıtty.
«Jas maman mártebesin anyqtaý úshin biz joǵarǵy oqý ornyn bitirgen, biraq óz mamandyǵyna jaqyn sala boıynsha jumys istemeıtin adam jas maman bolyp eseptele almaıdy degen usynys engizgimiz keledi. Bul qajet mamandyqty tańdap, sol boıynsha jumysqa ornalasýǵa yntalandyratyn bolady», - dep atap ótti M.Qojahmet.
Ekinshi usynys - joǵarǵy oqý ornyn syrttan bitirgen adam jas maman bolyp eseptelmeıtindigi. Sonymen qatar, departament jas mamandy quqyqtyq qorǵaý jónindegi usynysty da oılastyrýda. Mysaly, jas maman mártebesi men onyń quqyǵyn zańdastyrýdy ońaılatý sharalary usynylmaqshy, bul aqyly eńbek demalysyn alý quqyǵy men jumystan qysqartylýdan qorǵalýǵa da qatysty.
Jas maman pozıtsııasy quqyqtyq aspektilerde artta qalyp qoımaıtyndaı etip rettelýi kerek. Onyń oqý demalysyna quqysy bolýy kerek, ol jumystan shyǵyp qalýdan qorǵalýy qajet», - dep basa kórsetti M.Qojahmet.
Bul jyl Qazaqstan jastary úshin aıtarlyqtaı ári ózgerister jyly boldy. Memleket oǵan artta kele jatqan, tek áleýmettik kómekti ǵana qajet etetin lek retinde qaraýdy qoıdy, kerisinshe olarmen seriktestik qarym-qatynasqa kóshti. Jeke bastyń básekege qabilettiligi memleket pen jastardyń ózara qarym-qatynasyndaǵy eń negizgi tus bolyp tabylady», - dep qorytyndylady sózin QR BǴM jastar saıasatynyń basshysy.
