Qazaqstanda jas dıplomattarǵa arnalǵan jańa joba bastaldy
«Rýhanı jańǵyrý» baǵdarlamasy aıasyndaǵy Syrtqy ister mınıstrliginiń jobasyna Elordanyń 7 mektebiniń (№3, №4, №5, №6, №48, №75, №81) oqýshylary qatysyp jatyr.
Jobanyń maqsaty - jas jetkinshekterdi dıplomatııa salasymen jaqyn tanystyrý, QR SІM men elimizdegi sheteldik elshilikterdiń jumysyn kórsetý.
«Jas Diplomat» jobasynyń qatysýshylary qarasha-jeltoqsan aılarynda 7 memlekettiń (Brazılııa, Germanııa, Grýzııa, Koreıa, Japonııa, Polsha, Túrkııa) elshiligimen dıplomatııalyq qyzmettiń qyr-syrymen tanysý, sonymen qatar, tanymdyq maqsattaǵy sharalar uıymdastyrylady. Eki aıdan soń oqýshylar BUU modeline sáıkes «Bolashaqtyń energııasy» taqyrybynda otyrys ótkizip, energııa taqyrybyn talqyǵa salady.
«Bul jobany júzege asyrýda kóptegen daıyndyq jumystary júrgizildi. Bizdiń maqsat - jas dıplomattarǵa osy salanyń jumysyn kórsetý arqyly olardyń dúnıetanymy men oı-órisin keńeıtý, múmkindik berý. Sol sııaqty bolashaq dıplomat bolǵysy keletin jetkinshekterge baǵyt-baǵdar berý. Qatysýshy 7 memlekettiń elshileri bizdiń oqýshylarmen birlesip jumys jasap qana qoımaı, óz tájirıbelerimen bólisedi. Osy jerde taǵy bir aıta ketetin dúnıe, atalǵan sharany Elbasynyń jańa Joldaýynda aıtyp ótkendeı keler jyl jastar jyly retinde atalyp ótedi. Osy tusta bul is mańyzdy qadam dep sanaımyn», - dedi QR Syrtqy ister vıtse-mınıstri Roman Vasılenko.
Sonymen qatar, vıtse-mınıstr jobaǵa qatysýǵa qyzyǵýshylyq tanytqan elshilik ókilderine alǵysyn bildirip, jasóspirimderge berilgen múmkindikti keńinen paıdalaný kerektigin aıtyp ótti.
«Jas Diplomat» áleýmettik jobasyna sondaı-aq, QR Bilim jáne ǵylym mınıstrligi, Astana qalasynyń ákimdigi jáne BUU modeliniń úılestirýshi ortalyǵy qoldaý bildirýde.
