Qazaqstanda jas anaǵa kórsetiletin qoldaý álemniń damyǵan elderinde joq – Prezıdent
ASTANA. KAZINFORM – Qazaqstanda jas anaǵa bala kútimi úshin úsh jylǵa deıin demalys berilip, jumys orny tolyq saqtalady. Memleket basshysy Qasym-Jomart Toqaev osyndaı áleýmettik kepildikterdiń halyqaralyq reıtıngterde eskerilmeıtinin synǵa aldy.
– Qazaqstanda ǵana bosanǵan áıel úsh jylǵa dekrettik demalysqa shyqqanda, qarjylyq paketi men jeńildik tólemderi, eń bastysy, jumys orny saqtalatynyn eske salǵym keledi. Memleket jas analardy, kem degende, burynǵy jumysyna ornalastyrýǵa mindetti, – dedi Qasym-Jomart Toqaev Prezıdent saıabaǵynda ótken «Taza Qazaqstan» ekologııalyq aktsııasynda.
Halyqaralyq reıtıngterde udaıy kósh bastaıtyn elderdiń birqatarynda mundaı áleýmettik jeńildikter joq, bolýy da múmkin emes.
– Ol jaqta bosanǵan analar jarty aıdan keıin qyzmetine oralýǵa asyǵady, áıtpese jumysynan aırylady. Memleket kepildik beretin tegin kómek jaıynda estimegen, ondaı áleýmettik qoldaý sharalary bar degenge senbeıdi de. Al biz muny ashyq aıtpaımyz. Halyqaralyq reıtıngterde 30, 40, 50-oryndarda, tipti, odan da tómen satyda ornalasamyz. Azamattarǵa qandaı qamqorlyq kórsetilip jatqanyn eshkim bilmeıdi, – deıdi Memleket basshysy.
Buǵan deıin Prezıdent el ishindegi joldardyń sapasyna shúıligip, sabotajǵa teńegen edi.
Onyń aıtýynsha, Memleket óziniń áleýmettik mindettemelerinen eshqashan bas tartpaıdy. Óıtkeni bul mindet Konstıtýtsııamyzda anyq ári týra jazylǵan.
