Qazaqstanda jarymjan balalar sany artqan
NUR-SULTAN. QazAqparat - Sońǵy 7 jylda múmkindigi shekteýli balalar sany ósken. Bul týraly Senatta múmkindigi shekteýli balalardy áleýmettik qorǵaý taqyrybyna arnalǵan dóńgelek ústel otyrysynda Eńbek jáne halyqty áleýmettik qorǵaý vıtse-mınıstri Svetlana Jaqypova aıtty, dep habarlaıdy QazAqparat tilshisi.
«Múgedektigi bar balalardyń quqyǵyn áleýmettik qorǵaý bizdiń elimizdiń memlettik otbasylyq saıasatynyń ajyramas bóligi bolyp otyr. Osy oraıda, onyń tıimdiligi árqashan bizdiń múmkindigi shekteýli kishkentaı azamattarymyzdyń tirshilik etý jaǵdaılarynyń barlyq salalarynda, onyń ishinde bilim berý, densaýlyq saqtaý, mádenıet ári sportqa qatysý araqatynasymen ólshenetin bolady. Búginde Qazaqstanda 680 myń múgedektigi bar adam tirkelgen. Onyń ishinde balalardyń jalpy sanynyń 1,5 paıyzy jáne múgedekterdiń jalpy sanynyń 12,8 paıyzy 18 jasqa deıingi 87 myń múmkindigi shekteýli balany qamtyp otyr», - dedi vıtse-mınıstr.
Onyń atap ótýinshe, múmkindigi shekteýli jandardyń jalpy qurylymynda balalar úlesiniń ósý serpini baıqalady. Osylaısha, sońǵy 7 jylda ósim eki paıyzǵa deıin artyp otyr.
«Elimizde múgedektiktiń sebepteri aýrýlardyń úsh tobyna tıesili. 2018 jyldyń qorytyndysy boıynsha bul júıke júıesi aýrýlary, týa bitken aýytqýlar men psıhıkalyq jaǵdaılar úlesi 72,8 paıyzdy qurady. Sonymen birge, estý qabileti buzylǵan balalar sany 4,5 myń, kórý qabileti buzylǵandar 4,5 myń , júrip-turýynda qıyndyǵy barlar 28 myń», - dedi S. Jaqypova.
