Qazaqstanda jartylaı fabrıkat ónim shyǵaratyn joǵary tehnologııalyq zaýyt iske qosyldy
ASTANA. KAZINFORM – Aqmola oblysynyń Qosshy qalasynda «IL-TOV» JShS Qazaqstanda jáne Ortalyq Azııa óńirinde taýyqtyń tós etinen daıyn jartylaı fabrıkattar shyǵaratyn alǵashqy joǵary tehnologııalyq zaýyt iske qosyldy.
Joba «Qazaqstan Investment Corporation» AQ («Báıterek» UBH» AQ enshiles uıymy) qoldaýymen iske asyryldy.
«Azyq-túlik jelisinde kotletter, shnıtselder, mıtboldar, strıpter men naggetster 100% daıyn bolady da, keıin jedel muzdatýǵa jiberiledi. Shıkizat retinde jańa zaýyt buryn «Qazaqstan Investment Corporation» AQ qarjylandyrǵan «Makınsk qus fabrıkasy» JShS ónimderin paıdalanady», - delingen habarlamada.
Zaýyttyń ashylýy 90 jańa jumys ornyn qurýǵa jáne negizinen Qosshy turǵyndaryn jumyspen qamtýǵa múmkindik berdi. Qazirgi ýaqytta óndiristik jeliniń qýaty jylyna 3 346 tonna daıyn ónimdi quraıdy.
Osy ýaqytqa deıin «IL-TOV» JShS óndiretin ónimge uqsas ónim Qazaqstanǵa kórshi elderden tolyqtaı ımporttalyp kelgenin atap ótý mańyzdy.
Al, 2023 jylǵy qyrkúıektegi halyqqa Joldaýynda QR Prezıdenti Qasym-Jomart Toqaev Qazaqstannyń ımporttyq jetkizilimderge táýeldiligin tómendetýge múmkindik beretin jergiliktendirý úlesi joǵary óndiristerdi qurý qajettigin atap ótti.
Óz kezeginde, «IL-TOV» JShS qazaqstandyq ónimmen ımportty tolyǵymen almastyrýǵa qol jetkizip, bolashaqta zaýyttyń óndiristik qýatyn jylyna 10-12 myń tonnaǵa deıin ulǵaıtýdy josparlap otyr. Bul rette qyzmetkerler shtatyn 150 jumys ornyna deıin ulǵaıtý josparda bar.
Anyqtamalyq aqparat:
«Qazaqstan Investment Corporation» AQ — Qazaqstannyń turaqty ekonomıkalyq damýyna járdemdesý maqsatynda Qazaqstanda private equity ınfraqurylymyn damytý negizgi mıssııasy bolyp tabylatyn, 2007 jyly qurylǵan tikeleı ınvestıtsııalar qorlarynyń qory. «Báıterek» UBH» AQ enshiles uıymy bolyp tabylady. Qosymsha aqparatty https://qic.kz/ru saıtynan kórýge bolady.
