Qazaqstanda jartylaı daıyn ónimder baǵasy qansha teńge
ASTANA. KAZINFORM — Kazinform agenttiginiń tilshisi elimizdiń qalalaryndaǵy tushpara, manty men kotlet baǵasyn salystyrdy.
Ómirdiń qarbalasqa toly aǵymyna ilesip, jumystan úıge oralǵanda tamaq pisirý keıde qıynǵa soǵady. Jumys, balalarmen birge úı tapsyrmasyn oryndaý, kir jáne ydys aıaq jýý, keıde dostarmen kezdesip, kınoǵa barý, túrli basqosýlardyń bári bizdiń kúndelikti tirligimiz. Dál osy kezde jartylaı daıyn ónimderdi tutyný ýaqyt únemdeýge múmkindik beredi. Muzdatylǵan taǵamdy alyp, qazan nemese pesh ishine salyp, 20-25 mınýtta ústel basyný jınalý da qazir qalypty jaǵdaıǵa aınaldy. Mundaıda bári toq, kóńil de jaıly.
Qazir tushpara, manty jáne kotlet joǵary suranysqa ıe. Biz Qazaqstannyń barlyq qalasyndaǵy baǵany salystyrdyq. Oǵan sapa men óndirýshi áser etedi. Ádette jergilikti taýar óndirýshilerde baǵa tómen bolady. Soǵan qaramastan úıde jasalǵan tushpara men manty quny tsehta daıyndalǵan ónimge qaraǵan joǵary.
Elimiz boıynsha jartylaı daıyn ónimder, sonyń ishinde manty Petropavl qalasynda tómen. Sebebi munda Qazaqstanǵa belgili birneshe taýar óndirýshi jumys isteıdi. Petropavlda mantynyń kelisi 1800 teńge. Al Qostanaıda baǵa sál joǵary. Munda kelisi 2400 teńgeden bastalady. Oralda 2600, Semeı, Óskemen men Kókshetaýda baǵa 2700 teńge jáne odan joǵary. Pavlodar, Almaty men Qyzylordada daıyn mantynyń kelisi shamamen 3 myń teńge bolyp tur. Al Shymkent, Túrkistan, Taraz ben Aqtóbede baǵa 3500 teńgeden joǵary. Qaraǵandyda kelisi 4000, Jezqazǵanda 4500, Astanada 4600 teńge jáne odan da qymbat.
Qazaqstandyqtar tushparany da jıi daıyndaıdy. Eń arzany Oral qalasynda satylady. Munda kelisi 1176 teńge. Al Jezqazǵanda 1500, Kókshetaýda 1600, Petropavlda 1800 jáne Tarazda 1842 teńge. Qostanaı, Pavlodar men Shymkentte tushparanyń kelisi 1900 teńgege satylyp jatyr. Almaty, Túrkistan, Semeı men Óskemende baǵa 2600-2800 teńge aralyǵynda. Qazir Qyzylordada tushparanyń kelisi 3300, Aqtóbede 3500 jáne Astanada 3600 teńge bolyp tur. Elimiz boıynsha eń joǵary baǵa Qaraǵandyda. Munda turparanyń kelisi - 4000 teńge.
Tartylǵan etten daıyndalǵan kotlet Petropavlda arzan. Kelisi – 1500 teńge. Qostanaıda 2000 jáne Kókshetaýda 2700 teńge. Al Semeı, Óskemen, Túrkistan, Shymkent, Pavlodar, Taraz ben Almatyda baǵa 3 myń teńge jáne odan joǵary. Qyzylordada kotlettiń kelisi 3400 teńge, Oralda 3700 teńge. Al Aqtóbe men Qaraǵandyda jartylaı daıyn ónimniń bul túri 4000 teńge bolsa, Astanada 4200 teńge. Eń qymbaty Jazqazǵanda. Munda kelisi 5000 teńge jáne odan joǵary.
Buǵan deıin elimizdegi qarajıdek pen qaraqat baǵasy jazyldy.