Qazaqstanda jarty jylda jol apatynan myńǵa tarta adam kóz jumdy - Bas prokýratýra

ASTANA. KAZINFORM — 2025 jyldyń alǵashqy jartyjyldyǵynda elimizde 15 698 jol-kólik oqıǵasy (JKO) tirkeldi. Bul kórsetkish ótken jyldyń sáıkes kezeńimen salystyrǵanda 54 paıyzǵa artyq, dep habarlaıdy Bas prokýratýranyń Quqyqtyq statıstıka jáne arnaıy esepke alý jónindegi komıteti.

- Jol apattarynyń saldarynan 22 346 adam zardap shekken, onyń ishinde 955 adam qaza tapqan, - dep jazdy baqylaýshy organnan.

JKO-lardyń basym bóligi respýblıkalyq mańyzy bar tas joldarda oryn alǵan – 1 401 jaǵdaı. Bul oqıǵalarda 3 146 adam jaraqat alyp, 2 791 adam túrli deńgeıde zaqymdanǵan, 355 adam kóz jumǵan.

Eń kóp jol-kólik oqıǵasy Almaty (404), Aqmola (126) jáne Jambyl (121) oblystarynda tirkeldi.

JKO-ǵa kináli dep tanylǵandar:

• Jeńil avtokólik júrgizýshileri – 12 046

• Avtobýs júrgizýshileri – 520

• Moped júrgizýshileri – 438

• Júk kóligi júrgizýshileri – 390

• Jaıaý júrginshiler – 428

• Velosıpedshiler – 114

• Shaǵyn elektr kólikterin basqarýshylar – 58

• Elektr samokat júrgizýshileri – 48

Apattan zardap shekken balalardyń sany da kúrt artty: jaraqat alǵandar 74,3%-ǵa ósip, 3 185-ten 5 552 balaǵa jetti. Qaza tapqan balalar sany 7,1%-ǵa ósip, 126-dan 135-ke deıin kóbeıdi.

Qaıtys bolǵandardyń kóbi Túrkistan (27), Almaty (17), Jambyl (9) jáne Jetisý (9) oblystarynda tirkeldi.

Bas prokýratýra azamattardy jol qozǵalysy erejelerin qatań saqtaýǵa shaqyrady.

Aıta keteıik, búgin Atyraý oblysynda jol apatynan 2 júrgizýshi men 2 jolaýshy kóz jumdy.