Qazaqstanda jarty jylda tutynýshylardan 47 myńǵa jýyq ótinish tústi
ASTANA. KAZINFORM — Qazaqstanda 2026 jyldyń alǵashqy alty aıynda Tutynýshylardyń quqyqtaryn qorǵaý komıteti men onyń aýmaqtyq departamentteri 47 myńǵa jýyq azamattyń ótinishin qarady.
Komıtettiń alqa otyrysynda 2026 jyldyń birinshi jartyjyldyǵyndaǵy jumys qorytyndylary shyǵaryldy. Málimetke sáıkes, qaralǵan ótinishterdiń nátıjesinde 15 myń tutynýshynyń talaptary qanaǵattandyryldy (32%), 15,4 myń adamǵa quqyqtyq kómek pen konsýltatsııa berildi (32,8%), al 12 myń ótinish (25,8%) quzyrly memlekettik organdarǵa joldandy.
Ótinishterdiń basym bóligi bólshek saýda (18,4 myń), elektrondyq saýda (9,7 myń), turmystyq qyzmetter (4 myń), turǵyn úı-kommýnaldyq sharýashylyq (2,9 myń) jáne baılanys qyzmetterine (1,1 myń) qatysty bolǵan.
Eń kóp ótinish Almaty qalasynda — 9 064, Astanada — 6 221 jáne Shymkentte — 4 411 tirkelgen.
Alty aı ishinde tutynýshylardyń ótinishteri negizinde 776 tekserý júrgizilip, nátıjesinde 892 ákimshilik is qozǵaldy. Salynǵan aıyppuldardyń jalpy somasy 17,3 mln teńge boldy.
Komıtettiń málimetinshe, júrgizilgen jumystardyń nátıjesinde jalpy somasy 1,5 mlrd teńgege taýarlardy aıyrbastaý jáne aýystyrý qamtamasyz etilgen. Bul kórsetkish 2025 jyldyń sáıkes kezeńimen salystyrǵanda 15,3% joǵary.
Sondaı-aq «Sapaly ónim» jobasy aıasynda tekserilgen 874 ónimniń 623 ataýynan zańbuzýshylyq anyqtaldy. Onyń 84%-y tańbalaý talaptaryna, al 16%-y sanıtarııalyq-epıdemıologııalyq talaptarǵa qatysty bolǵan. Osy faktiler boıynsha 462 kásipkerlik sýbektisine qatysty tıisti den qoıý sharalary qabyldandy.
Eske salaıyq, buǵan deıin jyl basynan beri tutynýshylarǵa qansha qarajat qaıtarylǵany jóninde jazǵanbyz.
