Qazaqstanda jarty mıllıonǵa jýyq adam jumyssyz júr

Bıylǵy úshinshi toqsanda jumyssyzdyq deńgeıi (Halyqaralyq eńbek uıymynyń ádistemesi boıynsha) 4,7% qurady, dep habarlaıdy Kazinform ulttyq statbıýroǵa silteme jasap. 

Jumyssyzdar sany 451,5 myń boldy.

Jumys istemeıtin jáne bilim alýmen nemese oqytýmen aınalyspaıtyn NEET jastarynyń úlesi — 7,1%.

Maýsym aıynyń sońynda Eńbekmın dereginshe halyqty jumyspen qamtý organdaryna jumys izdep júrgen adam retinde 91,1 myń adam júgingen.

Jumyspen qamtý boıynsha barlyǵy 52,6 myń is-shara jasaldy, 18,4 myń adam kásiptik oqytýǵa nemese qaıta daıarlaýǵa, biliktiligin arttyrýǵa jiberildi.

4,9 myń adam qoǵamdyq jumysqa qatysty.

Halyqtyń jumyspen qamtylýyn iriktep zertteý derekteri boıynsha 2023 jyldyń III toqsanynda Qazaqstan ekonomıkasynyń túrli salalarynda 9,1 mln adam jumyspen qamtyldy.

Onyń ishinde 6,9 mln adam (ekonomıkada jumyspen qamtylǵandardyń jalpy sanynyń 76%) jaldamaly jumyspen, 2,2 mln adam (ekonomıkada jumyspen qamtylǵandardyń jalpy sanynyń 24%) ózin-ózi jumyspen qamtydy.

2022 jyldyń III toqsanymen salystyrǵanda jalpy jumyspen qamtý 134,5 myń adamǵa, negizinen jaldamaly jumyskerlerdiń (78,4 myń adam) esebinen ósti, sonymen qatar ózin-ózi jumyspen qamtyǵandar sany (56,1 myń adam) ósti.

Jumyspen qamtylǵandardyń eń kóp úlesi saýda (16,6%), bilim (12,8%), aýyl sharýashylyǵy (12,2%) jáne ónerkásip (12,1%) salalarynda baıqaldy.

Negizgi jumysta orta eseppen bir jumyspen qamtylǵan halyqtyń aptasyna naqty jumys istegen saǵaty — 38 saǵat, bir jaldamaly qyzmetkerge — 40 saǵat, ózin-ózi jumyspen qamtyǵan qyzmetkerge — 34 saǵat.

Jumyssyz, biraq jumys izdemegen nemese jumysqa kirisýge daıyn emes adam sany (áleýetti jumys kúshi) — 23 myń.

Jumys kúshi quramyna kirmeıtin adamdardyń úlesi 15 jáne odan joǵary jastaǵy halyqtyń 31,2%-yn qurady.