Qazaqstanda jappaı tártipsizdikke shaqyrǵandarǵa jaýapkershilik kúsheıtiledi
Búgin Senattyń jalpy otyrysynda «QR Qylmystyq, Qylmystyq-protsestik jáne Qylmystyq-atqarý kodeksterine qylmystyq sot tóreligi, jazany oryndaý jáne azaptaý men qatygez áreketterdiń aldyn alý salasyndaǵy adam quqyqtary máseleleri boıynsha ózgerister men tolyqtyrýlar engizý týraly» zań jobasy qaraldy.
Osy oraıda mynalar úshin sanktsııalardy kúsheıtý kózdelgen:
– jappaı tártipsizdikterge shaqyrý (QK 272-babynyń 1-bóligi, 3 jyldan 5 jylǵa deıin bas bostandyǵynan aıyrý), onyń ishinde telekommýnıkatsııa jelilerin paıdalana otyryp (QK 272-babynyń 2-bóligi, quqyq buzýshylyqtyń jańa quramy-3 jyldan 7 jylǵa deıin bas bostandyǵynan aıyrý) shaqyrý.
– qylmystyq top quramynda jasalǵan buzaqylyq (QK 293-babynyń 3-bóliginen 4-bóligine, 5-ten 7-jylǵa deıin bas bostandyǵynan aıyrý).
«Qylmystyq toptyń quramynda jasalǵan kisi óltirý men bandıtızm úshin sanktsııalar kúsheıtiledi. Mundaı adamdarǵa shartty túrde merziminen buryn bosatý múmkindigin boldyrmaý kózdelip otyr», - dedi mınıstr.
Búgin Senattyń jalpy otyrysynan keıin ótken baspasóz máslıhatynda tilshiler mınıstrge «jappaı tártipsizdikterge qatysty normany qatańdatý mıtıngi týraly zańǵa qaıshy kelmeı me» degen suraq qoıdy.
«Beıbit jolmen óziniń pozıtsııasyn aıtýǵa kelgen azamattardy polıtsııa jappaı tártipsizdik boıynsha qamaýǵa alýy múmkin be», - dep surady tilshiler.
Óz kezeginde M. Ahmetjanov zańda jappaı tátipsizdikke shaqyrǵan kezde ǵana jaýapkershilik qarastyrylatynyn aıtty.
«Qujatta mıtıng týraly sóz múldem joq. Mıtıngi men jappaı tártipsizdikti ajyrata bilý kerek. Nysandardy qıratý, órtteýge qatysty ınternet arqyly úndeý taratatyn bolsa, osy áreketterge jaýapkershilik eskerilgen», - dedi mınıstr.
