Elde janýarlardy qorǵaý talaptary kúsheıtiledi
ASTANA. KAZINFORM — Májilis ańshylyq salasy men janýarlar dúnıesin qorǵaýǵa qatysty zań jobalaryn ekinshi oqylymda maquldady.
Zań jobalary boıynsha Ekologııa máseleleri jáne tabıǵat paıdalaný komıtetiniń múshesi Amanjol Zeınýllın baıandama jasady.
Onyń aıtýynsha, qujat aıasynda úsh kodeks pen alty zańǵa ózgerister men tolyqtyrýlar engiziledi. Atap aıtqanda, ekologııalyq týrızm jobalaryn júzege asyrý úshin erekshe qorǵalatyn tabıǵı aýmaqtardyń keıbir jerlerin basqa maqsatqa paıdalanýǵa múmkindik berý usynylǵan.
Sonymen birge ormandy qorǵaý jáne qalpyna keltirý talaptaryn saqtaı otyryp, aǵashty tereń óńdeý jobalaryn iske asyrýǵa jáne iri orman órtteriniń saldaryn joıýǵa arnalǵan orman alqaptaryn uzaq merzimge paıdalaný quqyǵyn berý qarastyrylǵan.
— Sondaı-aq ınfraqurylym nysandaryn salý kezinde janýarlardyń mekendeıtin ortasyn jáne kóshý joldaryn saqtaý talaptary engiziledi, — dedi Amanjol Zeınýllın.
Onyń sózinshe, zań jobasynda elektr jelilerindegi qustardy qorǵaıtyn arnaıy qurylǵylar uǵymy da engizilgen.
Ákimshilik quqyq buzýshylyq týraly kodekske engiziletin túzetýler aıasynda janýarlarǵa qatygezdik kórsetkeni úshin jaýapkershilik kúsheıtiledi.
Budan bólek, janýarlardy kútip ustaý, vaktsınatsııalaý, sterıldeý, serýendetý jáne olardan bas tartýǵa qatysty talaptardy buzǵany úshin jaza qatańdatylady.
Aıta keteıik, buǵan deıin Prezıdent janýarlarǵa jaýapkershilikpen qaraý máselelerine qatysty zańǵa qol qoıǵan edi.
