Qazaqstanda jańǵyrtýdan keıin 30 vokzal iske qosyldy
ASTANA. KAZINFORM – Qazaqstannyń 10 óńirinde jańǵyrtýdan ótken 30 vokzal men jolaýshylar ınfraqurylymy nysany paıdalanýǵa berildi.
Jobalar Memleket basshysy men Úkimet tapsyrmalary aıasynda júzege asyryldy. Jumystardy «Qazaqstan temir joly», «Samuryq-Qazyna» qory jáne QR Kólik mınıstrligi birlesip júrgizdi.
Jańartylǵan nysandar qatarynda Taldyqorǵan, Qonaev, Býrabaı kýrorty, Rıdder, Shemonaıha, Jańaqorǵan, Qazaly, Shıeli, Taıynsha, Jańaesil, Saýmalkól, Aqkól, Shortandy, Makınka jáne basqa da stantsııalar bar.
– Jańǵyrtý barysynda vokzaldardyń qasbetteri, ınjenerlik jelileri men jolaýshylar platformalary jańartyldy. Zamanaýı kútý zaldary jabdyqtalyp, kedergisiz orta qalyptastyryldy jáne jańa qaýipsizdik júıesi engizildi, – dep habarlady QTJ-dan.
Sondaı-aq Qaraǵandy-Suryptaý stantsııasynyń nysandary men Talap jáne Bozshakól stantsııalaryndaǵy jolaýshylar ınfraqurylymy jańartyldy.
Kompanııa málimetinshe, temirjol ınfraqurylymyn jańǵyrtý jumystary elimizdiń barlyq óńirinde jalǵasady. Jobalar «Qazaqstan temir joly» qarajaty esebinen qarjylandyrylady.
Aıta keteıik, Almaty-1 temirjol vokzalyn qaıta jańǵyrtýǵa 500-den asa maman tartylǵan.
