Qazaqstanda AJISEN RAMEN meıramhanalar jelisin damytý kózdelip otyr
ASTANA. KAZINFORM- Shin-Line Group kompanııasy men halyqaralyq AJISEN RAMEN meıramhanalar jelisiniń ıesi japondyq Shigemitsu Industry kompanııasy master-franshıza berý jáne birlesken kásiporyn qurý týraly kelisimge qol qoıdy. Seriktesterdiń josparyna sáıkes, 2027–2031 jyldary Qazaqstanda jáne óńir elderinde 50-ge deıin meıramhana ashý kózdelip otyr.
QR Aýyl sharýashylyǵy mınıstrliginiń baspasóz qyzmetiniń habarlaýynsha, kelisimge Japonııadaǵy Qazaqstan Elshiliginde Shin-Line Group prezıdenti Andreı Shın men Shigemitsu Industry prezıdenti Katsýaqı Shıgemıtsý qol qoıdy.
Uzaq merzimdi áriptestik aıasynda Ajisen Ramen Central Asia birlesken kásiporny qurylyp, ol óńirlik basqarý, franchaızıng, óndiris jáne ónimderdi jergilikti naryqqa beıimdeý fýnktsııalaryn atqarmaq. Keńeıtýdiń negizgi kezeńi 2027–2031 jyldarǵa josparlanǵan.
Qazaqstan jobanyń negizgi operatsııalyq, logıstıkalyq jáne óndiristik bazasyna aınalady. Osy jerden brend kezeń-kezeńimen Ortalyq Azııa, EAEO elderi, Kavkaz jáne Shyǵys Eýropa naryqtaryna shyǵady. AJISEN RAMEN-niń alǵashqy meıramhanasyn Almaty qalasynda ashý josparlanyp otyr.
Almaty oblysynyń Baıserke aýylyndaǵy Shin-Line óndiristik qýattary bazasynda biryńǵaı japondyq sapa standarttaryn qamtamasyz etetin, logıstıkalyq úderisterdi ońtaılandyratyn jáne shıkizatty jergilikti deńgeıde barynsha paıdalanýǵa múmkindik beretin ortalyqtandyrylǵan óndiris orny qurylady. Bul rette halal talaptaryn mindetti túrde saqtaý kózdeledi.
Yntymaqtastyq aıasynda japondyq ozyq tehnologııalardy, óndiristik standarttar men taǵam daıyndaý retsepterin transfertteý jáne olardy jergilikti tutynýshylardyń talǵamyna saı jasaýǵa basa nazar aýdarylady.
Bul seriktestik óńirde japondyq gastronomııalyq mádenıettiń jańa ortalyǵyn qalyptastyrýǵa, sheteldik ınvestıtsııalar tartýǵa, jańa jumys oryndaryn ashýǵa jáne Qazaqstannyń tamaq ónerkásibine ınnovatsııalyq basqarý standarttaryn engizýge jol ashady.
Osyǵan deıin qazaq ashanasy Jenevada Michelin meıramhanasynda tanystyrylǵany týraly jazyp edik.
