Qazaqstanda jándik óltiretin ýly hımıkattardy satýǵa tyıym salyndy

NUR-SULTAN. QazAqparat – Elimizde jándikterdi óltirýge arnalǵan ýly hımıkattardyń satylýyna shekteý qoıyldy, dep habarlaıdy QazAqparat QR DSM Taýarlar men qyzmetterdiń sapasy men qaýipsizdigin baqylaý komıtetine silteme jasap.

«Qazaqstan Respýblıkasynda halyqtyń sanıtarlyq-epıdemıologııalyq densaýlyǵyn qamtamasyz etý maqsatynda dezınsektsııalyq jáne deratızatsııalyq qyzmette qoldanylatyn ýytty zattarmen ýlaný faktileriniń tirkelýine baılanysty 2020 jyldyń 20 aqpanynda QR Bas memlekettik sanıtarlyq dárigeriniń orynbasary N. Sádýaqasov «Sanıtarlyq-profılaktıkalyq sharalardy júrgizý týraly» qaýly shyǵardy», delingen komıtet habarlamasynda.

Osylaısha, búginnen bastap 1, 2, 3 synypqa jatatyn qaýipti dezınsektsııa jáne deratızatsııa quraldaryn satýǵa tyıym salyndy.

Atalǵan ýaqytsha sanıtarlyq shara QR zańnamasyna tıisti ózgerister engizilgenge deıin azamattardyń densaýlyǵyna jáne qorshaǵan ortanyń jaǵdaıyna zııan keltirý qaýpin tómendetýge múmkindik beredi.