Qazaqstanda jańartylatyn energetıkany damytýǵa qolaıly jaǵdaılar jasalady
NUR-SULTAN. QazAqparat – Májilis depýtaty Shavhat Ótemisov elde jańartylatyn energetıkany damytý úshin qandaı qolaıly jaǵdaılar jasalatynyn aıtyp berdi, dep habarlaıdy QazAqparat tilshisi.
«Bul maqsatta usynylyp otyrǵan sharalardyń qatarynda jańartylatyn energııa kózderiniń elektr energııasyn satyp alýǵa arnalǵan kelisimsharttyń qoldanylý merzimin 15 jyldan 20 jylǵa deıin ulǵaıtý kózdelgen. Sondaı-aq jańartylatyn energııa kózderiniń elektr energııasyn satyp alýdy júzege asyrý merzimin 5 jylǵa uzartý usynylady. Ol ınvestorǵa aýktsıondyq saýda-sattyqta neǵurlym tómen tarıfterdi usynýǵa jaǵdaı jasaıdy. Bul óz kezeginde tutynýshylardyń shyǵyndaryn tómendetýge múmkindik beredi», - dedi Shavhat Ótemisov jańartylatyn energııa kózderin paıdalanýdy qoldaý jáne elektr energetıkasy máseleleri boıynsha zań jobasyn tanystyrý kezinde.
Onyń aıtýynsha jańartylatyn energııa kózderi jobalary aldyndaǵy tólemder boıynsha óz mindettemelerin oryndamaý jaǵdaıy kezdesýi múmkin. Mundaı jaǵdaıda zań jobasynda Úkimet tarapynan qarjy-esep aıyrysý ortalyǵyna kómek kórsetý týraly norma usynylǵan.
