Qazaqstanda janarmaı eksportyna tyıym salý merzimi uzartylady
ASTANA. KAZINFORM — Energetıka mınıstrligi «Qazaqstan Respýblıkasynyń aýmaǵynan munaı ónimderin áketýdiń keıbir máseleleri týraly» birlesken buıryqtyń jobasyn daıyndady.
– Qazaqstan Respýblıkasynyń aýmaǵynan, onyń ishinde Eýrazııalyq ekonomıkalyq odaqqa múshe memleketterge benzınderdi, dızel otynyn jáne munaı ónimderiniń jekelegen túrlerin avtomobıl kóligimen áketýge alty aı merzimge tyıym salý engizilsin, - delingen jobada.
Myna túrdegi munaı ónimderin shyǵarýǵa tyıym salynbaıdy:
- avtokólik óndirýshisi usynǵan gaz tsısternalarynda shyǵarý;
- ónerkásiptik óndiriske engizý maqsatynda tájirıbelik partııadan alynǵan úlgilerdiń qospalaryn irikteýge, biliktilik jáne zerthanalyq synaqtar boıynsha ǵylymı-zertteý jumystaryn júrgizýge arnalǵan avıatsııalyq otyn;
- QR Úkimetiniń sheshimi boıynsha gýmanıtarlyq kómek sheńberinde eksporttalatyn munaı ónimderiniń jekelegen túrleri.
Buıryq jobasy «Ashyq NQA» portalynda 2024 jyldyń 19 tamyzyna deıin ornalastyrylǵan.
