Qazaqstanda janarmaı baǵasy kóterildi
ASTANA. 25 qazan. QazAqparat - - Qazaqstanda janarmaı qymbattady, dep habarlaıdy Tengrinews.kz QR Tabıǵı monopolııalardy retteý agenttigine silteme jasap.
«Baǵalaryna memlekettik retteý belgilengen bólshek saýdada ótkiziletin munaı ónimderine shekti baǵalar QQS esebimen myna mólsherde belgilendi: dızel otyny - 1 lıtrge 102 teńge; Aı-80 - 1 lıtrge 89 teńge; Aı-92 - 1 lıtrge 115 teńge», - dep kórsetilgen habarlamada.
Mundaı ózgeriske tómendegi faktorlar sebep boldy. Qazaqstan Respýblıkasy Munaı jáne gaz mınıstrliginiń derekteri boıynsha ústimizdegi jyldyń 15 qazany boıynsha Brent markaly munaı baǵasy barreline 109,65 AQSh dollaryn qurady. Budan basqa DSU talaptaryna sáıkes, sondaı-aq Kedendik odaq jáne Biryńǵaı ekonomıkalyq keńistik sheńberinde óńdelgen Temir jol kóliginiń qyzmetterine qol jetkizýdi retteý týraly kelisimge sáıkes baǵyttar túri boıynsha (respýblıka ishi, eksport jáne ımport) tarıfterdi kezeń boıynsha ýnıfıkatsııalaý júrgizýge baılanysty ústimizdegi jyldyń qańtarynan bastap munaı ónimderin temirjolmen ishki baǵytta tasymaldaý tarıfteri ortasha eseppen 44% ósti.
«Baǵalaryna memlekettik retteý belgilengen bólshek saýdada ótkiziletin munaı ónimderine shekti baǵalardy belgileý týraly» 2013 jylǵy 24 qazandaǵy №316-NQ Agenttiktiń buıryǵy Qazaqstan Respýblıkasy Munaı jáne gaz jáne Ekonomıka jáne bıýdjettik josparlaý mınıstrlikterimen kelisilgen.
