Qazaqstanda jańaratyn energııanyń qymbatshylyǵy kúrdeli kedergi emes - Nobel syılyǵynyń laýreaty
ASTANA. QazAqparat - Búgin Astanada Klımattyń ózgerý salasyndaǵy eńbegi úshin Nobel syılyǵynyń laýreaty Mohan Mýnasınge jańaratyn energııa kózderin arzandatý máselesine qatysty saýal qoıyldy, dep habarlaıdy QazAqparat.
«Qazaqstanda dástúrli energııa kózderi basqa elderge qaraǵanda óte arzan bolyp otyr, osy oraıda jańaratyn energııa kózderine aýysý aıtarlyqtaı qymbatqa túsedi. Bul turǵyda Qazaqstanǵa ne isteý kerek? Turaqty damý maqsattary ár eldiń jaǵdaıyna qaraı qandaı da bir problemalardy barynsha eńserýge negizdelýi tıis. Atap aıtqanda, birqatar elderde kún energııasy panelderi kóptep ornatylýda, sáıkesinshe osy panelder bul memleketter úshin arzan baǵamen ornatylýda. Shyn máninde Qazaqstanda jańaratyn energııa kózderiniń qymbatqa túsýi bul baǵytty keńinen engizýde aıtarlyqtaı kúrdeli kedergi emes. Sondyqtan da qazba energııa kózderin tómendetý problemasy jańaratyn energııa qunyn tómendetýdiń ekonomıkalyq tetikterimen túıindesýi kerek»,-dedi Mohan Mýnasınge «Qorshaǵan ortany qorǵaý salysyndaǵyǵy halyqaralyq ekonomıka men saıasat» atty konferentsııada.
Bul turǵyda ǵalym energııa úshin jerasty baılyqtaryn jaǵyp qana qoımaı, balamaly energııa kózderin arzandatý baǵytynda da úılestirilgen jumystardy atqarý kerektigin qadap aıtty.
«Árbir memleket múddeli barlyq tarapty jınap, dál qandaı tetikter jańaratyn energııa kózderi qunyn arzandatatynyn pysyqtaýy qajet. Osy oraıda ózge elderdiń tájirıbesin paıdalaný qylmys bolyp sanalmaıdy»,-dep túıindedi sózin Mohan Mýnasınge.
Budan buryn habarlanǵandaı, shilde aıynda Astanada energetıka máselelerine arnalǵan konferentsııada QR Energetıka mınıstri Qanat Bozymbaev Qazaqstanda kún energııasynan alynatyn qýattyń quny arzandaıtynyn aıtqan bolatyn.
