Qazaqstanda janar-jaǵarmaı baǵasy bir jylda qanshalyqty qymbattady

NUR-SULTAN. QazAqparat - Energyprom.kz sarapshylary jyl ishinde Qazaqstanda benzın men dızel otyny qandaı deńgeıde qymbattaǵanyn anyqtady, dep habarlaıdy QazAqparat tilshisi.

«2022 jyldyń mamyr aıyndaǵy jaǵdaı boıynsha ótken jyldyń osy kezeńimen salystyrǵanda benzın quny 4,7 paıyzǵa qymbattady. Tıisti kezeńde otyn baǵasy úshinshi jyl qatarynan ósip otyr. Al dızel otynynyń quny birden 41,5 paıyzǵa kóterildi. Osy oraıda bul otyn túri buǵan deıin eki jyl qatarynan arzandaǵanyn atap ótken jón», - delingen taratylǵan málimette.

Atap aıtqanda, jazǵy dızel otyny bir jylda 24,6 paıyzǵa, AI-98 markaly benzıni - 9,6 paıyzǵa, AI-95/96 —9,1 paıyzǵa, sondaı-aq AI-92 benzıni 4,2 paıyzǵa qymbattady.

Bıylǵy mamyr aıynda AI-92 markaly benzıniniń ortasha bólshek saýda baǵasy lıtrine 178 teńgeni, AI-95/96 — 210 teńgeni, AI-98 — 232 teńgeni, al jazǵy dızel otynynyń bir lıtriniń quny 234 teńgeni qurady.

AI-92 benzıniniń joǵary baǵasy Petropavlda (lıtri 182 teńge), AI-95/96 bezıniniń qymbattaý (215 teńge) somasy Almatyda, sonymen qatar AI-98 markaly benzıniniń bir lıtri úshin joǵary quny Qostanaıda (238 teńge) baıqaldy.

Elimiz boıynsha arzan benzın Atyraýda boldy. Bul óńirde AI-92 benzıniniń baǵasy lıtrine 168 teńge, AI-95/96 — 201 teńge, AI-98 benzıni 227 teńge shamasynda tirkeldi. Sonymen qatar Aqtaýda da AI-95/96 markaly benzıniniń quny lıtrine 201 teńgege, Qaraǵandy men Oralda AI-98-diń baǵasy 227 teńgege baǵalanǵan.

Jazǵy dızel otyny Qostanaı men Petropavlda (lıtri 260 teńge) qymbattaý bolsa, Shymkentte eń tómen (225 teńge) baǵa baıqaldy.

GlobalPetrolPrices.com saıtynyń málimetinshe, 2022 jyldyń 6 maýsymyndaǵy jaǵdaı boıynsha benzın baǵasynyń arzandyǵy jaǵynan Qazaqstan 170 eldiń arasynda 11-shi orynda (lıtri 0,48 AQSh dollary) turaqtady.

Al dızel otynynyń quny turǵysynda 169 eldiń ishinde 16 orynǵa (0,55 dollar) jyljydy.

Álem elderiniń arasynda eń qymbat benzın Gonkongta (lıtri 2,96 AQSh dollary), Norvegııada (2.86 dollar), Danııada (2,73 dollar), Fınlıandııada (2,68 dollar) jáne Islandııada (2,52 dollar) tirkeldi.

Dızel otyny boıynsha Gonkongta (2,73 dollar), Shvetsııada (2,68 dollar), Norvegııada (2,6 dollar), Monakoda (2,43 dollar), sondaı-aq Islandııada (2,46 dollar) joǵary baǵa belgilengen.