Qazaqstanda janama yntalandyrý qadamdaryn engizý usynyldy

NUR-SULTAN. QazAqparat – Qazaqstanda elektrondy jáne korporatıvti qaıyrymdylyq tetikterin janama yntalandyrý is-sharalaryn engizý usynyldy. Bul týraly Aqparat jáne qoǵamdyq damý mınıstri Aıda Balaeva málim etti, dep habarlaıdy QazAqparat tilshisi.

«Birinshiden, elektrondy jáne korporatıvti qaıyrymdylyq tetikterin janama yntalandyrý is-sharalaryn engizý usynylyp otyr. Ekinshiden, qaıyrymdylyq ári volonterlik uıymdarǵa zańdy mártebe berý bóliginde qosymsha qadamdar engizilip jatyr», - dedi mınıstr «Qaıyrymdy ister marafonynyń» bastalýyna arnalǵan is-sharada.

Onyń sózine qaraǵanda, salyq jeńildikteri arqyly qarjylyq yntalandyrý máselesi pysyqtalyp jatyr.

«Osy jańashyldyqtardy qabyldaý arqyly eldegi qaıyrymdylyq qozǵalysy turaqty qarqyn alatynyna, al osy marafonnyń bastalýymen olardyń qatary Táýelsizdiktiń 30 jyldyǵynda óz úlesin sózben emes, ispen atqarýǵa tańdaý jasaǵan naǵyz patrıottarmen tolyǵatynyna senimdimin», - dedi A. Balaeva.

Osy oraıda ol qoǵam men bıznes ókilderi tarapynan qajetti usynystar men bastamalardy kútetinin aıtty.

Budan buryn habarlanǵandaı , búgin elordada donorlar men metsenattardyń qatysýymen «Qaıyrymdy ister marafony» bastaldy.

Aıta keteıik, «Qaıyrymdy ister marafony» bastamasyn Memleket basshysy Qasym-Jomart Toqaev kótergen bolatyn.