Qazaqstanda jańadan MMA federatsııasy qurylyp, basshylary saılandy
ASTANA. QazAqparat - Qazaqstanda jańadan qurylǵan MMA federatsııasynyń basshysy bolyp Asylbek Dúısenov saılandy, dep habarlaıdy QazAqparat.
Tóraǵa orynbasarlary Anatolıı Kım men Mıkaıl Nadırov boldy.
Búgin ótken baspasóz máslıhatynda Qazaqstannyń MMA aralas jaýyngerlik jekpe-jek federatsııasy men Qazaqstannyń aralas jekpe-jek kúresi federatsııasy «Qazaqstannyń MMA federatsııasy» ZTB bolyp qaıta qurylǵandyǵy málim etildi.
Atalmysh sheshim MMA aralas jekpe-jek túrleriniń elimizdegi damýyna jol ashý maqsatynda jasaldy. Bul óz kezeginde, atalmysh sporttyń Qazaqstanda damýyna ǵana emes, kásipqoı jáne áýesqoı sporttaǵy halyqaralyq jarystar men arenalarda óner kórsetetin qazaqstandyq sportshylardyń alǵa jyljýyna óz kómegin bermek.
Federatsııa enshisinde kóp jylǵy tájirıbe men jetistikter, tıisti quzyr men quqyq bar.
Mıkaıl Nadırov IMMAF halyqaralyq federatsııasyna Qazaqstannyń múshelik etýi, aldaǵy ýaqyttarda bolatyn ózgerister jaıly aıtyp berdi.
Nadırovtiń sózinshe, áýesqoılar men kásipqoılardy naqty sanattarǵa bólý kózdelgen.
«Kásipqoı sportshylar áýesqoı jarystarǵa qatystyrylmaıdy, osy arqyly biz áýesqoılar arasynda teń básekelestik ortany qalyptastyramyz. Áýesqoı ortada ábden ysylyp, halyqaralyq arenalarda júlde shaq keltirmegen sportshylardy promoýterler qolǵa alyp, tanymal promoýshnderde kásipqoı alańdarda mansaptaryn jalǵastyra alady. Keıin mansaptyń eń bıik shyńy - UFC alańyna deıin kóterile alady», - dedi ol.
Atalmysh uıym ókilderine qoıylatyn talap joǵary, ásirese, WADA antıdopıngtik saıasatyn ustaný basty nazarda. Sondyqtan barlyq palýandar jarys aldynda tyıym salynǵan dárilerge qatysty synaqtan ótedi.
Nadırovtiń habarlaýynsha, federatsııa da osy saıasatty ustanatyn bolady.
«Bizdi álemdegi dopıngke qarsy úrdis qatty qýantady. Biz barlyǵymyz kezinde sportpen shuǵyldandyq, eger barlyǵyn durys istep, jaqsy daıyndalsa, dopıngtiń qajeti de joq. Eń myqty dopıng - patrıotızm», - dep atap ótti Nadırov.
