Qazaqstanda jańadan qabyldanǵan zańnama boıynsha taǵy bir úkim shyqty

ATYRAÝ. KAZINFORM - Atyraý oblysynyń Qurmanǵazy aýdandyq sotynda stalkıng jasady degen kúdikke ilingen azamatqa qatysty QR Qylmystyq kodeksiniń 115 babynyń 1-bóligi, ıaǵnı stalkıng boıynsha qatysty qylmystyq is qaraldy. Bul týraly Atyraý oblystyq sotynyń baspasóz qyzmeti habarlady.

2025 jyldyń 5 qyrkúıeginde sottalýshy jábirlenýshiniń úıine baryp, esigin tartyp, terezesin qaǵyp, qashyp ketken. Odan keıin aıyptalýshy jábirlenýshiniń qozǵalysyn baqylaý maqsatynda «2GIS» qosymshasy arqyly onyń kámeletke tolmaǵan balalarynyń uıaly telefondaryna óz akkaýntynan «dostyqqa» suranym jiberip, nátıjesinde onyń ulynyń ornalasqan jerin baqylaýǵa múmkindik alǵan.

Sottalýshy 19 qyrkúıekte mas bolyp, óziniń quqyqqa qarsy áreketterin toqtatpaı, jábirlenýshiniń erkine qarsy, zorlyq-zombylyqsyz qýdalaý maqsatynda qaıtadan úıine baryp, ashyq turǵan aýlaǵa kirip, terezelerinen qaraǵan.

Prokýror sottalýshyǵa 200 saǵat qoǵamdyq jumystarǵa tartý túrindegi jazany taǵaıyndaýdy, al jábirlenýshi sottalýshyǵa qatań jazany taǵaıyndaýdy, sondaı-aq moraldyq zııandy óndirýdi surady. Stalker kinásin ishinara moıyndady.

Sot otyrysynda sottalýshynyń ishinara moıyndaýymen, jábirlenýshilerdiń jáne kýálardyń aıǵaqtarymen, oqıǵa ornynan alynǵan beınejazbamen jáne basqa da is materıaldarymen sottalýshynyń ańdý áreketterin jasaǵany dáleldendi.

Sot úkimimen QR QK-tiń 115-1-babynda kózdelgen qylmystyq teris qylyqty jasaǵany úshin kináli dep tanylyp, oǵan 200 saǵat qoǵamdyq jumystarǵa tartý túrindegi jaza taǵaıyndaldy. Stalkıng jasaǵan azamat jábirlenýshige 400 myń teńge moraldyq ótemaqy, sondaı-aq ókildiń eńbegine tólengen 200 myń teńge shyǵyndy tóleý mindetteldi.

Sot úkimi zańdy kúshine engen joq.

Eske salaıyq, osyǵan deıin Semeıde qyzǵa stalkıng jasaǵan er adamǵa qatysty qylmystyq is qozǵalǵany týraly habarlaǵan edik.