Qazaqstanda Jańa jyl meıramynda órt sany úsh esege artady - QR TJM
ASTANA. 27 jeltoqsan. QazAqparat - Qazaqstanda Jańa jyl meıramynda órt sany úsh esege artady. Bul týraly búgin baspasóz máslıhatynda QR TJM Órtke qarsy qyzmet komıtetiniń basqarma bastyǵy Marat Hasenov málim etti.
«Órtter statıstıkasy kórsetip otyrǵanyndaı, órt oqıǵalary ásirese Jańa jyl merekesi kezeńinde kóptep oryn alady. Eger Qazaqstanda táýligine 50-60 órt shyǵatyn bolsa, Jańa jyl merekesi kúnderi órtter men zardap shekkenderdiń sany 3 ese artady», - deıdi M.Hasenov.
Máselen, ótken jyly jańa jyldy qarsy alý merekesi kúnderi 194 órt shyǵyp, 16 adam qaza tapty. Sońǵy úsh jylda mereke kúnderi barlyǵy 553 órt tirkelip, 42 adam qaza bolǵan.
«Mundaı órtterdiń basym kópshiligi turǵyn úı sektorynda bolatynyn atap ótken jón. Bul memlekettik órt baqylaý turǵysynan barynsha rettelmeı otyrǵan sala. Statıstıka boıynsha Qazaqstanda órtterdiń shamamen 68 paıyzy turǵyn úı aýmaǵynda bolady. Jańajyldyq mereke kúnderi bul tsıfr shamamen 82-85 paıyzǵa artady», - dep túıdi sózin basqarma bastyǵy.
Osyǵan oraı Tótenshe jaǵdaılar mınıstrligi Jańa jyldy atap ótý is-sharalaryn ótkizý kezinde órt qaýipsizdigi erejesin saqtaý qajettiligi týraly eskertedi.
