Qazaqstanda Jańa jyl qarsańynda qosymsha poıyzdar qatynaıtyn bolady

ASTANA. QazAqparat - Qazaqstanda Jańa jyl merekesi qarsańynda qosymsha poıyzdar jolǵa shyǵady, dep habarlaıdy «Jolaýshylar tasymaly» AQ baspasóz qyzmeti.

Mereke qarsańyndaǵy jáne mereke kúnderindegi jolaýshylar tasymalyna degen suranysty qanaǵattandyrý maqsatynda tómendegi baǵyttar boıynsha qosymsha poıyzdar saparǵa shyǵady:

- №152/151 Astana-Almaty-1, poıyz Astanadan 2015 jyldyń 29 jeltoqsanynda, 2016 jyldyń 1 qańtarynda, Almatydan 2015 jyldyń 30 jeltoqsanynda, 2016 jyldyń 2 qańtarynda jolǵa shyǵady.

- №153/154 Astana-Qostanaı, poıyz Astanadan 2015 jyldyń 27 jeltoqsanynda, Qostanaıdan 2015 jyldyń 28 jeltoqsanynda jolǵa shyǵady.

- №156/155 Qaraǵandy-Jezkazǵan poıyzy Qaraǵandydan 2015 jyldyń 15, 17, 19, 25, 27, 29 jeltoqsanynda, 2016 jyldyń 2 qańtarynda jáne Jezqazǵannan 2015 jyldyń 16, 18, 20, 26, 28, 30 jeltoqsanynda, 2016 jyldyń 3 qańtarynda jolǵa shyǵady.

- №452/451 Almaty-2-Dostyq poıyzy aptasyna úsh ret Almatydan 2015 jyldyń 14-28 jeltoqsany aralyǵynda dúısenbi, sársenbi, juma kúnderi, al Dostyq stansasynan 2015 jyldyń 15-29 jeltoqsany aralyǵynda seısenbi,beısenbi jáne jeksenbi kúnderi jolǵa shyǵady.

- №454/453 Almaty-1-Semeı poıyzy, Almatydan 2015 jyldyń 27 jeltoqsanynda, Semeıden 2015 jyldyń 28 jeltoqsanynda jolǵa shyǵady.

Budan bólek, 2015 jyldyń 27 jeltoqsanynan bastap №47/48 Atyraý-Astana «Kaspıı» júrdek poıyzy endi jańa baǵyt: Kókshetaý-Novoıshım-Qostanaı-Tobyl-Nıkeltaý-Qandyaǵash stansalary arqyly (buryn Atbasar, Esil, Qusmuryn, Tobyl, Nıkeltaý, Qandyaǵashtyń ústimen ótetin) kúnara júretin bolady. Poıyz Atyraýdan jup kúnderi, Astanadan taq kúnderi jolǵa shyǵady.

2016 jyldyń 4-shi qańtarynan bastap Qaraǵandy-Kıev baǵyty boıynsha (Astana-Kıev poıyzynyń ornyna) №107/108 jolaýshylar poıyzy taǵaıyndaldy. Poıyz aptasyna bir ret Qaraǵandydan dúısenbi, al Kıevten beısenbi kúnderi saparǵa attanady.