Qazaqstanda jańa «Jomart júrek» syılyǵy taǵaıyndalady

ASTANA. QazAqparat - Qazaqstan Respýblıkasy Din isteri jáne azamattyq qoǵam mınıstri Nurlan Ermekbaev jyl saıyn «Jomart júrek» syılyǵynyń jeńimpazdaryn marapattaý rásimin uıymdastyrýdy tapsyrdy, dep habarlaıdy QazAqparat.

«Azamattyq jaýapkershilikti joǵary qoıatyn qazaqstandyqtardy qoǵamdyq yntalandyrý asa mańyzdy. «Rýhanı jańǵyrý» baǵdarlamasy aıasynda óńirler men jergilikti qaýymdastyqtar damýyna úles qosqan azamattar marapatqa laıyqty.  Sondyqtan, týǵan jeriniń damýyna óz ómirin jáne tabysynyń bir bóligin arnaǵan azamattardy madaqtaý úshin Azamattyq qoǵam isteri komıtetine «Jomart Júrek» saltanatyn uıymdastyrýdy tapsyramyn» - dedi Nurlan Ermekbaev mınıstriliktiń alqasynyń keńeıtilgen otyrysynda.

N. Ermekbaevtyń aıtýynsha, mınıstrlik qazirgi ýaqytta «Rýhanı jańǵyrý» baǵdarlamasynyń «Týǵan jer» baǵyty boıynsha «Atameken» shaǵyn baǵdarlamasyn júzege asyryp jatyr. Shaǵyn baǵdarlama jergilikti qaýymdastyqtyń ózekti máselelerin sheshý úshin azamattardyń, ÚEU-dyń, eriktilerdiń, metsenattar men bıznes-qurylymdardyń jáne memlekettik organdardyń kúsh-jigerin biriktirýge baǵyttalǵan.

Shaǵyn baǵdarlama sheńberinde «Áleýmettik bastamalar kartasy» jáne «Jomart júrek» jobalary júzege asyrylady. 2017 jyly «Atameken» shaǵyn baǵdarlamasy aıasynda jalpy quny 43 mlrd 530 mln teńgeni quraıtyn 1197 joba aıaqtalǵan.

«Bul jobalar aıasynda elimizge «halyqtyq» ınvestıtsııalar túrinde aýqymdy kómekter jasaldy. Azamattar, negizinen kásipkerler áleýmettik nysandar salýǵa, olardy rekonstrýktsııalaýǵa jáne qazirgi zamanǵy jabdyqtarmen qamtamasyz etýge qarajat sala bastady», - dep atap ótti Nurlan Ermekbaev.