Qazaqstanda jańa jol jabyndysy synaqtan ótkizilýde
ASTANA. 24 qazan. QazAqparat - Qazaqstannyń Aqmola, Atyraý jáne Almaty oblystarynyń avtokólik joldaryndaǵy synaq ýchaskelerinde «Mıkrosıýrfeısıng» túrindegi jańa jol jabyndysyn synaqtan ótkizý bastaldy. Jańa tehnologııa joldyń buzylý úrdisin toqtatýǵa múmkindik beredi jáne joǵary tehnıkalyq sanattaǵy tas joldarda qoldanylatyn bolady.
«Joldyń buzylýynyń aldyn-alý ádisin qoldaný qarjyny únemdeýge baǵyttalǵan. Aıtalyq, joldarǵa 7-10 jyldan keıin kúrdeli jóndeý júrgizgennen góri, erterek jol jabyndysyna jóndeý jumysyn júrgizgen aıtarlyqtaı arzanǵa túsedi»,-dep atap ótti Avtomobıl joldary komıtetiniń tóraǵasy Zamır Saǵynov.
Mıkrosıýrfeısıng jol jabyndysynyń birqatar erekshelikteri bar: sýdy sińirmeıdi, jol soraptaryn boldyrmaıdy, joldyń pishinin túzeıdi, avtomobıl kóliginiń qozǵalys barysyndaǵy shýylyn azaıtady. Atalǵan jol jabyndysy aýyr salmaqtyń túsýine tózimdi keledi jáne 5 jylǵa deıin jóndeý jumystaryn qajet etpeıdi.
Mıkrosıýrfeısıng jabyndysy elimizdiń klımattyq jaǵdaıy ár túrli bolyp keletin 3 oblysta: Atyraý oblysyndaǵy «Atyraý -Astrahan» avtojolynyń 18 shaq-da, Almaty oblysyndaǵy «Almaty-Bishkek» avtojolynyń 10 shaq-da, Aqmola oblysyndaǵy «Astana qalasynyń ońtústik aınalma jolynyń» 10 shaq-da synalyp jatyr.
Synaq qorytyndysy oń nátıje bergen jaǵdaıda 2014 jyldyń kókteminde Mıkrosıýrfeısıng jabyndysyn elimizdiń joldarynda keńinen qoldaný bastalady. Bul týraly QR Kólik jáne kommýnıkatsııa mınıstrliginiń baspasóz qyzmetinen habarlady.
