Qazaqstanda jańa jol belgisi paıda bolmaq
ASTANA. QazAqparat - Qazaqstanda jol qozǵalysy erejelerine «Beınebaqylaý júrgizilýde» degen biryńǵaı belgini qosý josparlanýda.
Qazirgi kezde QR ishki ister mınıstrligi «Astana Innovations» kompanııasymen birge osy máseleni talqylaýda, dep habarlady kolesa.kz saıty.
«Biz ІІM-men birge Jol qozǵalysy erejelerine belgi engizý máselesin pysyqtaýdamyz. Qazirgi Astana men Almaty qalalaryndaǵy jyldamdyq ólsheýishter týraly belgiler ártúrli. Biz ІІM-men birlese otyryp, biryńǵaı - «Beınebaqylaý júrgizilýde» degen belgi oılastyrýdamyz, ony kórgen júrgizýshi beınetaspaǵa túsirip jatqanyn biledi de, tártip buzbaýǵa tyrysady, bul tártip buzýshylyqtyń aldyn alýǵa jaqsy», - dedi «Astana Innovations» basqarma tóraǵasynyń orynbasary Dosjan Dosymqulov.
Onyń aıtýyna qaraǵanda, JQE-ine engizýge josparlanyp otyrǵan belgi jyldamdyq ólsheý men beınebaqylaý kameralaryna biryńǵaı bolmaq.
Budan buryn QazAqparat habarlaǵandaı, Astananyń avtojoldaryna 694 beınebaqylaý kameralary, sonyń ishinde 53 jyldamdyq ólsheýish, toqtaý jelisi men qıylystardaǵy «qyzyl shamnan» ótýdi tirkeıtin 11 kamera-ıntegro ornatylǵan.
