Qazaqstanda Jańa jyldyq shyrshalar quny qansha turady
Qazaqstandyqtar Jańa jyl merekesine daıyndalyp jatyr. Kazinform tilshisi elimizdegi shyrsha baǵasyna baqylaý jasady.
Jańa jyl qarsańynda tabıǵı jáne jasandy shyrshaǵa suranys artyp, baǵa da kóteriletini belgili. Biz bazardaǵy eń tómen baǵany salystyryp kórdik.
Tabıǵı shyrsha
Tiri shyrshanyń eń arzany Petropavlda bolyp shyqty. Munda baǵa 3 myń teńgeden bastalady. Aımaq Reseı Federatsııasyna jaqyn bolǵan soń baǵa da soǵan saı tómen bolyp tur. Qazirgi kezde óńirge shyrsha dál osy elden ákelinip jatyr.
Al ekinshi orynda Qostanaı men Oral qalalary tur. Munda tiri shyrsha 4 500 teńgeden satylyp jatyr. Al Kókshetaý, Atyraý men Pavlodarda baǵa aldyńǵy aımaqtarǵa qaraǵanda 500 teńgege qymbat. Jańa jyl jaqyndaǵan saıyn mereke atrıbýtyn 5 000 teńgeden arzanǵa tappaısyz.
Aıta keteıik, shyrsha baǵasy onyń ásemdigine baılanysty. Uzyn ári qalyń shyrsha sapasyna qaraı qymbattaı beredi. Almatydan ortasha deńgeıdegi shyrshany 5 500 teńgeden satyp alýǵa bolady. Al Astanada shyrsha quny 6 000 teńgeden bastalyp tur.
Sonymen birge Qaraǵandyda da shyrsha satylymda bar. Munda baǵa 7 myń teńgeden bastalady. Jezqazǵanda qylqanjarypaqtyny 7 500 teńgeden satyp alýǵa bolady.
Aqtaý, Qyzylorda, Semeı, Óskemen, Shymkent qalalarynda tabıǵı shyrsha baǵasy 20 myń teńgeden bastalady. Shymkentte shyrsha ázirge tamyrymen arnaıy topyraqta satylady. Al merekege arnaıy kesilgeni bazarǵa 20 jeltoqsannan bastap shyǵarylady.
Al eń qymbat tiri shyrsha elimiz boıynsha Taraz qalasynda bolyp shyqty. Munda baǵa 30 myń teńgeden bastalady. Taldyqorǵan, Aqtóbe, Túrkistannan bul taýardy tabý múlde múmkin emes. Bazar men saýda oryndarynyń mańynan tabylmady.
Aıta keteıik, Kazinform buǵan deıin makaron, nan, shujyq, irimshik jáne ózge de taǵam túri qansha turatynyn anyqtap bildi.