Qazaqstanda jańa zaýyttarǵa beriletin memlekettik qoldaý tártibi ózgeredi
ASTANA. KAZINFORM — Qazaqstanda jumys istep turǵan óndiris bolǵan jaǵdaıda jańa zaýyttarǵa memlekettik qoldaý shekteledi, dep habarlaıdy Kazinform tilshisi.
Qazaqstan Prezıdenti Qasym-Jomart Toqaev mashına jasaý jáne kólik salalaryn damytý máseleleri boıynsha zańǵa qol qoıdy. Qujatta qoldanystaǵy óndirister bar bolǵan jaǵdaıda jańa ónerkásiptik jobalarǵa memlekettik qoldaý kórsetýge shekteý engizý, ónerkásiptik klasterler qurý jáne arnaıy ekonomıkalyq aımaqtarǵa (AEA) qatysýshylar úshin jańa talaptar qarastyrylǵan.
Zań eki kodeks pen 13 zańǵa ózgerister men tolyqtyrýlar engizedi. Negizgi jańashyldyqtardyń biri – óndiristik qýattar teńgerimin baǵalaý tetigin engizý. Bul mehanızm ishki naryqtaǵy suranysty qoldanystaǵy kásiporyndar tolyq qamtamasyz etip otyrǵan jaǵdaıda jańa jobalarǵa memlekettik qoldaý sharalaryn kórsetýge jol bermeýge baǵyttalǵan.
Mashına jasaý salasynda otandyq óndirýshilerdiń básekege qabilettiligin arttyrý, arnaıy ekonomıkalyq aımaqtardyń jumysyn jetildirý jáne óndiristik tehnologııalardy damytýǵa baǵyttalǵan sharalar kózdelgen.
Sondaı-aq ónerkásiptik klasterler ınstıtýty engiziledi. Bul kásiporyndarǵa jobalardy birlesip júzege asyrýǵa, logıstıka, ınfraqurylym jáne kadr daıarlaý máselelerin tıimdi sheshýge múmkindik beredi dep kútilýde.
Arnaıy ekonomıkalyq aımaqtarǵa qatysýshylar úshin qarsy mindettemeler belgilenedi. Atap aıtqanda, ónerkásiptik-ınnovatsııalyq nysandar salý kezinde qazaqstandyq taýarlardy paıdalanýy tıis. Al ónim óndirý barysynda otandyq shıkizat pen materıaldardy qoldaný mindetteledi.
Sonymen qatar kólik quraldarynyń quramdas bólshekterin ónerkásiptik qurastyrý jónindegi kelisimderge de ózgerister engizildi. Jańa normalar Qazaqstanda óndirilgen shassılerdi mindetti túrde paıdalaný arqyly avtomobılder men aýyl sharýashylyǵy tehnıkalaryn shyǵarýdy ulǵaıtýǵa baǵyttalǵan.
Avıatsııa salasyndaǵy túzetýler qazaqstandyq áýe kemeleriniń shetel memleketteriniń áýe keńistigindegi ushýyn retteýdi, sondaı-aq Halyqaralyq azamattyq avıatsııa uıymynyń (IKAO) standarttaryna sáıkes áýe kompanııalaryn ulttyq zańnamanyń jekelegen talaptarynan ýaqytsha bosatý tetigin qarastyrady.
Bul sharalar halyqaralyq avıatsııalyq qaýipsizdik baǵalaýynan sátti ótýge jáne Qazaqstan men AQSh arasynda tikeleı áýe qatynasyn ashýǵa múmkindik berýge baǵyttalǵan.
Eske salaıyq, buǵan deıin Memleket basshysy tsıfrlandyrý, derekterdi qorǵaý jáne pılotsyz kólik máseleleri boıynsha zańǵa da qol qoıǵan bolatyn.
