Qazaqstanda jańa úlgidegi ásker jasaqtalady: Toqaev tapsyrma berdi
ASTANA. KAZINFORM — Memleket basshysy qazir elimiz túbegeıli jańǵyrý men ózgeris jolyna nyq senimmen qadam basqanyn atap ótti, dep habarlaıdy Aqordanyń baspasóz qyzmeti.
Qasym-Jomart Toqaev qoǵamnyń barlyq salasynda aýqymdy reformalar júzege asyrylǵanyna nazar aýdardy.
— Elimizdiń basty maqsaty da, mindetteri de — aıqyn. Biz birtutas qoǵam bolyp zań men tártip ústemdik quratyn, yntymaǵy myqty, birligi bekem, Ádiletti, Ozyq, Kúshti jáne Taza Qazaqstandy quryp jatyrmyz. Jalpy halyq qoldaǵan jańa Konstıtýtsııamyz 1 shilde kúni zańdy kúshine endi. Bul — búkil elimiz úshin tarıhı oqıǵa. Konstıtýtsııamyzǵa kóptegen el zor yqylaspen nazar aýdardy. Óıtkeni Konstıtýtsııa jarqyn bolashaqqa jol ashatyn qasterli qujatymyz, ultymyzdyń temirqazyǵy retinde zaman talabyna saı múlde jańa sıpatqa ıe boldy. Konstıtýtsııada adam jáne onyń ómiri eń joǵary qundylyq ekeni aıqyn jazyldy. Azamattyq qorǵanys salasynyń ár qyzmetkeri adam ómirin qorǵap, Konstıtýtsııamyzdyń osy myzǵymas qundylyǵyn saqtaýǵa zor úles qosýda. Sondyqtan elimizdiń barsha qutqarýshylaryn qaýipsiz Qazaqstannyń myzǵymas tiregi desek, artyq bolmaıdy, — dedi Memleket basshysy.
Prezıdenttiń aıtýynsha, ultymyzdyń bolashaǵyna tikeleı áser etetin osyndaı irgeli ózgeristerdiń arqasynda memlekettik basqarý júıesi tolyq jańǵyrdy.
— Elimizde bir palataly Quryltaı jumys isteı bastady. Konstıtýtsııalyq mártebesi bar eń joǵary konsýltatıvtik organ — Qazaqstan Halyq Keńesi de óz jumysyna kiristi. Qaýipsizdik Keńesiniń reformasy júrgizildi. Taıaý arada barlyq deńgeıdegi máslıhattardyń saılaýy ótedi. Qazirgi tańda meniń tapsyrmammen elimizdiń Qarýly kúshterin reformalaý, jańa úlgidegi ásker jasaqtaý jumysy bastaldy. Qazaqstannyń armııasy qazirgi zamannyń áskerı talabyna saı, basqa sózben aıtqanda, árbir qaýip-qaterge toıtarys berýge daıyn ozyq, myqty qarýly kúsh bolýǵa tıis. Sebebi Qazaqstannyń táýelsizdigi men egemendigin kózdiń qarashyǵyndaı qorǵaý, ulttyq qaýipsizdikti qamtamasyz etý, azamattarymyzdyń quqyqtary men bostandyqtaryn saqtaý memleketimizdiń strategııalyq mindeti sanalady, — dedi Memleket basshysy.
Budan buryn Prezıdent Qasym-Jomart Toqaev qutqarýshylarǵa memlekettik marapattar tapsyrǵanyn jazǵanbyz.
