Qazaqstanda jańa tehnologııalarǵa kóshý jumystary elektr stantsııalarynan bastalady – senator
NUR-SULTAN. QazAqparat – Qazaqstan kásiporyndaryn eń ozyq qoljetimdi tehnologııaǵa kóshirý jumystary energetıka salasynan bastalady.
Bul týraly QR Parlamenti Senatynyń depýtaty Baqytjan Jumaǵulov aıtyp berdi, dep habarlaıdy QazAqparat tilshisi.
«Búgin biz ekologııanyń jáne jasyl ekonomıkanyń eń ózekti máselelerin talqylaýǵa jınaldyq. Taza ekologııa men ekonomıka qurý – aıtarlyqtaı kúrdeli mindet. Bir jaǵynan, óndiristik sektorlar halyqty qajetti taýarlarmen qamtamasyz etedi. Ekinshi jaǵynan dál osy sektorlar qorshaǵan ortany lastaıdy. Bul jaǵdaıdan qalaı shyǵamyz? Prezıdent bıylǵy Qazaqstan halqyna Joldaýynda elimizdiń jasyl damýyna erekshe nazar aýdardy. Birinshiden, bul ult densaýlyǵyna, halyqtyń jáne qoǵamnyń ál-aýqatyna tikeleı qatysty. Atalǵan mindetterge qol jetkizý úshin QR Ekologııa, geologııa jáne tabıǵı resýrstar mınıstrligi úlken jumys atqarýda. Jańa Ekologııalyq kodekstegi birinshi kezektegi mindet – qazaqstandyq kásiporyndardy eń ozyq qoljetimdi tehnologııalarǵa (EQT) – tehnıkanyń eń úzdik jetistikteri qaǵıdattaryna aýystyrý bolyp otyr», - dep atap ótti B. Jumaǵulov.
Eń ozyq qoljetimdi tehnologııalar (EQT) — sharýashylyq qyzmettiń qorshaǵan ortaǵa teris áserin azaıtýǵa baǵyttalǵan, uıymdastyrý jáne basqarý sharalaryn qamtamasyz etetin salalyq tehnologııalar, tehnıka jáne jabdyq. ıAǵnı, OQT naqty bir ónerkásip salasynyń erekshelikterin eskere otyryp, qorshaǵan ortaǵa teris áserin azaıtýdyń anaǵurlym sapaly jáne ekonomıkalyq negizdelgen baqylaý elementi bolýy tıis.
Baqytjan Jumaǵulovtyń aıtýynsha, OQT paıdalaný – eldiń jasyl damýynyń, ekologııa múddesinde saı tepe-teńdikti qamtamasyz etýdiń úzdik álemdik tájirıbesi. Bul tehnologııa EYDU-nyń 39 elinde jáne Belarýs, Qytaı jáne Reseı elderinde qoldanylady. Onyń maqsaty – ekologııalyq taza jáne bıznes úshin qoljetimdi tehnologııalardy qaıta óńdeý. ıAǵnı, qorshaǵan ortaǵa teris áserdi barynsha azaıtý.
«Qazir Halyqaralyq jasyl tehnologııalar jáne ınvestıtsııalyq jobalar ortalyǵy ǵylymı-tehnıkalyq keńes múshelerimen birlesip, energetıka, taý-ken metallýrgııa, hımııa salalarynyń 50 iri kásiporny úshin túsindirý, keshendi tehnologııalyq baǵalaý jumystaryn júrgizýde. Elimizdiń energetıkalyq sektory – lastaıtyn zattar shyǵarýdyń eń iri kózi ekenin eskerýimiz kerek. Onyń úlesinde Qazaqstan boıynsha shyǵaryndylardyń shamamen 40% bar. Osy faktorlardyń barlyǵy bizdi energetıka salasynan bastap eń ozyq qoljetimdi tehnologııalarǵa kóshýge baǵyttap otyr. Birinshiden, OQT-ǵa kóshýdi 14 elektr stantsııasynan bastaımyz, olarǵa zııandy zattardyń jalpy el shyǵaryndylarynyń shamamen 30% tıesili», - dedi depýtat.
Sonymen birge, B. Jumaǵulov eń ozyq qoljetimdi tehnologııalar qaǵıdatyna kóshýdiń jan-jaqty taldaý men zertteýdi talap etetin, uzaq eńbekti qajet etetin protsess ekenin basa aıtty.
«Jańa ózgerister udaıy zertteý men talqylaýdy qajet etedi. Sondyqtan búgingi alańda elimizdiń jasyl damýy úshin eń ozyq qoljetimdi tehnologııalar qaǵıdatyna kóshýdiń tıimdi, qajetti sheshimderin talqylaý úshin, ázirleý úshin jınaldyq. Búgingi konferentsııa osy salada tájirıbe men bilim almasý úshin kásibı jáne syndarly dıalog qurýǵa múmkindik beretinine senimdimin», - dedi Baqytjan Jumaǵulov.
Aıta keteıik, Halyqaralyq jasyl tehnologııalar ortalyǵynda «Jasyl» ekonomıka jáne eń ozyq qoljetimdi tehnologııalar qaǵıdattaryna kóshý máseleleri» atty ІІ halyqaralyq konferentsııa ótip jatyr.
Konferentsııanyń basty spıkerleri retinde qazaqstandyq sarapshylar jáne Lastanýdyń aldyn alý jáne baqylaý jónindegi Eýropalyq keshendi bıýronyń basshysy Serj Roýdıe, BUU ESKATO Qorshaǵan orta jáne damý departamentiniń dırektory Stefanes Fotıý, Qorshaǵan orta jónindegi nemis agenttiginiń ónerkásiptik shyǵaryndylar dırektıvasy jónindegi ýákiletti ulttyq organnyń sarapshysy Katıa Kraýs sııaqty taıaý jáne alys shetelden kelgen sarapshylar qatysady.
