Qazaqstanda jańa taý-ken jáne energetıkalyq jobalar iske asyrylmaq
ASTANA. KAZINFORM — Qazaqstan Respýblıkasy Premer-mınıstriniń birinshi orynbasary Nurlybek Nálibaev negizgi ınvestıtsııalyq jobalardy iske asyrý máseleleri boıynsha keńes ótkizdi. Bul týraly Úkimettiń baspasóz qyzmeti málim etti.
Keńes barysynda «Aıdarly» jobasyn, Jetisý oblysynyń Kerbulaq aýdanynda taý-ken baıytý kombınatyn salý, Kóksaı ken ornyn ıgerý jónindegi ınvestıtsııalyq jobany, «Novodjambýlskıı fosfornyı zavod» JShS, «Qazfosfat» JShS jobalaryn, Kýrchatov qalasynda qýaty 700 MVt kondensatsııalyq elektr stansasyn, Jezqazǵan JEO-da qýaty 75 MVt bý-gaz qondyrǵysyn salý máseleleri qaraldy.
Nurlybek Nálibaev óńirler men ónerkásipti damytýǵa baǵyttalǵan jobalardy tabysty iske asyrý úshin Úkimet tarapynan jan-jaqty qoldaý kórsetý jalǵasatynyn rastady.
Jıyn barysynda jobalardy iske asyrýǵa áser etetin máselelerdi ýaqtyly sheshý úshin memlekettik organdar men kompanııalardyń úılestirilgen jumysyn qamtamasyz etý qajettiligi atap ótildi.
Keńes qorytyndysy boıynsha múddeli memlekettik organdar men uıymdarǵa qaralǵan ınvestıtsııalyq jobalar jónindegi bastamalardy pysyqtaý boıynsha birqatar tapsyrmalar berildi.
Aıta keteıik, buǵan deıin Premer-mınıstrdiń birinshi orynbasary Nurlybek Nálibaevtyń tóraǵalyǵymen avtojol salasy máseleleri jóninde keńes ótti.
