Qazaqstanda jańa spýtnıktik baılanys jumys isteı bastaıdy
ASTANA. KAZINFORM – Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine baılanys, tsıfrlandyrý jáne aqparattandyrý salasynyń ınvestıtsııalyq ahýalyn arttyrý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
«Zań jobasy úsh bloktan turady. Bul rette, baılanys salasyn damytý, tsıfrlandyrýdy damytý, ınnovatsııalardy qoldaý eskerilen», - dedi Májilis depýtaty Ekaterına Smyshlıaeva.
Qujatta mynadaı is-sharalar qarastyrylǵan:
- radıojıilik spektoryn qaıta qaraý,
- baılanys ınfraqurylymy úshin oryndardy bas josparǵa engizý;
- vırtýaldy baılanys operatorlarynyń quqyqtyq mártebesin engizý;
- baılanys jelileri men qurylystaryn ornalastyrý oryndaryna operatorlardyń teń dárejede qol jetkizýin zańnamalyq bekitý;
- aýyl sharýashylyǵy jáne ónerkásip nysandarynda baılanys qyzmetterin sýbsıdııalaý;
- avtokólik joldarynda talshyqty-optıkalyq baılanys jelilerin qamtamasyz etýdi mindetteý;
- geostantsıonarlyq emes baılanys spýtnıkteriniń jumysyn retteý;
- jergilikti atqarýshy organdarǵa baılanys ınfraqurylymyn qurý salasynda qosymsha quzyret berý.
Zań jobasynda salalyq sheshimderdi tsıfrlandyrý úshin quqyqtyq jaǵdaılar engizilgen. Máselen, jańa týǵan nárestege JSN bekitý jáne basqa da is-qımyldar eskerilgen. Taratylǵan málimetke qaraǵanda, jeke derekterdi joǵaltý qaýpin boldyrmaý úshin, bala týǵannan keıin birden, ıaǵnı alǵashqy 20 mınýt ishinde jeke sáıkestendirý nómirin (JSN) berý usynyldy. Osylaısha alaıaqtyq jáne adam urlaý sııaqty zańsyz áreketterdiń qaýpin azaıtý qarastyrylǵan.
«Zań jobasy qabyldanǵan jaǵdaıda baılanys jelileriniń qurylysy jedeldeıdi. Ekinshiden, baılanys qyzmetteriniń sapasy jaqsarady, qamtý aımaqtary keńeıedi. Úshinshiden, baılanys operatorlary arasynda básekelestik damytylady. Tórtinshiden, jańa spýtnıktik baılanys jumys isteı bastaıdy», - dedi Ekaterına Smyshlıaeva.
