Qazaqstanda jańa redaktsııadaǵy Qylmystyq kodeks 2015 jyldan bastap qoldanyla bastaıdy
ASTANA. 24 qazan. QazAqparat - Jańa redaktsııadaǵy Qylmystyq kodeks 2015 jyldan bastap qoldanysqa engiziledi.
Bul týraly búgin Májiliste jańa redaktsııadaǵy QR Qylmystyq Kodeksiniń tanystyrylymy barysynda málim boldy.
Toqtala ketetin jaıt, búgingi qoldanystaǵy Qylmystyq Kodeks 1998 jyly qoldanysqa enip, oǵan osy ýaqytqa deıin birneshe márte ózgerister engizilgen. Sondyqtan da, qylmystyq zańnamany jetildirý zaman talabynan týyndap otyr.
«Jańa redaktsııadaǵy Kodeks ázirleýdiń taǵy bir qajettiligi ony el Konstıtýtsııasynyń jańa normalarymen, sonymen qatar, osy ýaqytqa deıin ratıfıkatsııalanǵan halyqaralyq kelisimdermen sáıkestendirýge qatysty bolyp tabylady. Jalpy, qylmystyq zańnamany izgilendirý Elbasy Jarlyǵymen bekitilgen 2020 jylǵa deıingi quqyqtyq saıasat tujyrymdamasyna sáıkes bolýy shart. Al bul tujyrymdama boıynsha qylmystyq zańnamany halyqaralyq kelisimdermen sáıkestendirý jáne zańdy tulǵalardyń qylmystyq jaýapkershiligin engizýdiń myńyzdylyǵy qarastyrylǵan bolatyn», dedi Zańnama jáne sot-quqyqtyq reforma komıtetiniń tóraǵasy Rahmet Muqashev.
Depýtattyń aıtýynsha, kodeks jobasynda sybaılas jemqorlyqpen ymyrasyz kúrestiń memlekettik saıasaty da kórinis taýyp, sybaılas jemqorlyq qylmysqa jaýapkershiliktiń keshendi normalary qamtylady. Budan bólek, áleýmettik turǵydan osal adamdar jasaǵan qylmysqa qatysty toleranttyq ustanymdy keńeıtiledi, ekinshi jaǵynan aýyr qylmystarǵa, qylmystyń qaıtalaný kórinisterine, uıymdasqan qylmysqa jáne sot tóreligine qarsylyq bildirýge qatysty sharalar qatańdatylady.
«Kodeks 2015 jyly qoldanysqa engiziledi dep kútilip otyr. Sondyqtan da, qylmystyq zańnamany jetildirýge qatysty zań jobalaryn jan-jaqty talqylaýǵa ýaqyt jetkilikti bolady dep oılaımyn», dedi R. Muqashev.
