Qazaqstanda jańa oqý jyly qarsańynda páter jaldaý baǵasy qalaı ózgerdi
ALMATY. KAZINFORM – Jazdyń sońy – Qazaqstandaǵy turǵyn úıdi jalǵa berý naryǵynyń jandana túsetin kezeńi: óńirlerden kelgen stýdentter jappaı iri qalalarǵa qonys aýdarady, al jalǵa berýshiler baǵany kóteredi. Kazinform tilshisi oqý jyly qarsańyndaǵy jaldaý qunynyń qalaı ózgergenin zerttep kórdi.
Maýsymdyq faktor jáne baǵanyń kúrt ósýi
Sarapshylardyń aıtýynsha, jalǵa berý naryǵy el ishindegi oqıǵalarǵa satyp alý-satý naryǵyna qaraǵanda áldeqaıda sezimtal ári tez jaýap qaıtarady. Máselen, jýyrda Astana men Almatyda ótken Djennıfer Lopestiń kontsertteri kezinde is-shara ótetin oryndarǵa jaqyn aýdandardaǵy táýliktik jaldaý quny 50-60 myń teńgege deıin kóterilgen. Osyndaı jaǵdaı maýsym aıynda
Almatyda ótken Thirty Seconds to Mars tobynyń kontserti kezinde de bolǵan.
– Dál osylaı naryq oqý jyly bastalar aldyndaǵy suranystyń ósýine de áser etedi, -deıdi Colliers Kazakhstan kompanııasynyń marketıng bóliminiń jetekshisi Igor Kýrnosov. – Tamyz-qyrkúıek aılarynda Almaty, Astana men Shymkentke óńirlerden ondaǵan myń stýdent keledi, olardyń kópshiligi jataqhana ornyna páter jaldaýdy jón kóredi. Jaldaýǵa suranystyń kúrt artýyn ınternettegi izdeý nátıjelerinen de baıqaýǵa bolady. Jyl saıyn tamyzda «páter jaldaý», «úı jalǵa alý» sııaqty sózderdi adamdar áldeqaıda jıi izdeı bastaıdy. Sondyqtan jazdyń sońynda páter jaldaý baǵasynyń kóterilýi – jyl saıyn qaıtalanatyn qubylys.
Baǵa qanshalyq ósti
2025 jylǵy naýryzben salystyrǵanda páter jaldaý edáýir qymbattady: • Almatyda: bir bólmeli páterler – 20-21%, eki bólmeli – 13-14% ósti; • Shymkentte: tıisinshe 23-24% jáne 15-16% qymbattady; • Astanada: bir jáne eki bólmeli páterlerdiń jaldaý aqysy 30%-dan astam ósti.
Kýrnosovtyń aıtýynsha, tamyzda baǵa jyl saıyn ósedi jáne kem degende birneshe paıyzdyq ósim 2024, 2023, 2022 jáne 2021 jyldary da baıqalǵan.
Sonymen birge páter jaldaý boıynsha tanymal onlaın-platformalarda 60 myń teńgeden bastalatyn túrli nusqany tabýǵa bolady. Baǵa aýdanyna, kólemine jáne páterdiń jaǵdaıyna baılanysty ózgerip otyrady. Alaıda sarapshy jalǵa alýshylarǵa eskertý jasady: kóp habarlandyrý eskirgen bolýy múmkin nemese ony alaıaqtar jarııalaýy múmkin. Sol sebepti kelisim jasamas buryn aqparatty muqııat tekserý qajet.
Uzaqmerzimdi úrdister
2022-2023 jyldardaǵy Reseı azamattary elge jappaı kele bastaǵan kezde baǵa kúrt ósken edi, qazir odan beri jaldaý naryǵy birshama turaqtaldy. Ol kezde suranys sonshalyq joǵary bolǵandyqtan, Almaty men Astanada qarapaıym páterlerdiń ózi aıyna 500-600 myń teńge surady. Qazir mundaı baǵa sırek kezdesedi: kelýshilerdiń bir bóligi elden ketip qaldy, al jergilikti turǵyndar mundaı qymbatshylyqqa daıyn emes.
– Shilde aıynda Qazaqstanda jaıly páterdi jalǵa alýdyń ortasha quny sharshy metrine 4 544 teńge boldy. Bul byltyrǵydan 8% joǵary, jalpy alǵanda ınflıatsııa deńgeıine sáıkes keledi.
Keıingi bir-eki jylda naryq turaqtala tústi deýge bolady. Degenmen jaldaý baǵasy áli de halyq úshin tym qymbat: ortasha jalaqymen salystyrǵanda páter jaldaý quny Qazaqstan óńirlerinde shamamen 35-55% aralyǵynda, - dedi Kýrnosov.
Eske salaıyq, buǵan deıin elde turǵyn úı quny qanshalyqty óskenin jazǵan edik.