Qazaqstanda jańa oqý baǵdarlamasy boıynsha áskerı ushqyshtardy irikteý bastaldy (FOTO)
Birinshi kýrs - jalpyáskerı fakýltette oqý, ekinshi kýrs - úlgerimi, densaýlyq jaǵdaıy jáne medıtsınalyq kórsetilimder eskerile otyryp, mamandyqtar boıynsha bólý. Mundaı júıe áskerı joǵary oqý ornynda alǵash ret engizilip otyr.
Osyndaı ádisteme bolashaq mamandardy daıarlaýdyń sapasyn arttyrýǵa múmkindik beredi jáne mamandyqtar týraly naqty túsinik alyp, bir jyl oqyǵannan keıin durys tańdaý jasaý úshin jastardyń ózderine paıdaly bolady dep kútilýde. Qazirgi ýaqytta ushý ınstıtýty oqýǵa túsýge jańa jınaqtaýdy bastady. Konkýrstyq irikteýdi (psıhologııalyq test, dene daıarlyǵy normatıvteri, medıtsınalyq tekserý) jasóspirimder joǵary oqý ornynda ótedi. Qazirdiń ózinde munda Aqtóbe men Aqtóbe oblysynan jınalǵan alǵashqy 50 talapker kelip jetti, al 26 shildege deıin Qazaqstannyń ózge óńirlerinen shamamen 130 jasóspirim keledi dep kútilýde. Munda talapkerlerdiń sany jaǵynan áskerılerge, atap aıtqanda, ushý mamandyqtaryna suranys artyp keledi deýge bolady. Kóptegen jas bozbalalar ózderiniń keleshegin ushqysh nemese ınjener kásibimen baılanystyryp, elimizdiń Qarýly Kúshterinde qyzmet etkisi keledi. Keńes Odaǵynyń eki márte Batyry T. Bıgeldınov atyndaǵy Áýe qorǵanysy kúshteriniń Áskerı ınstıtýty bilikti ushqyshtardy, ınjener-mehanıkterdi, shtýrmandardy, radıoınjenerlerdi daıyndaýdy júzege asyratyn Orta-Azııalyq óńirdegi birden-bir joǵary oqý orny bolyp tabylatynyn aıta keteıik. Bul bilim oshaǵynda toǵyz mamandyqta 500-ge jýyq kýrsant, onyń 50-i ujymdyq qaýipsizdik týraly Shart Uıymy sheńberinde bilim nárimen sýsyndaýda, dep habarlaıdy QR Qorǵanys mınıstrliginiń baspasóz qyzmeti.