Qazaqstanda jańa manevrlik qýattar qashan salynatyny belgili boldy
NUR-SULTAN. QazAqparat - «KEGOC» AQ basqarma tóraǵasy Baqytjan Qajıev jańartylatyn energııa kózderi salasynda (JEK) jańa manevrlik qýattar salýǵa qatysty túsinik berdi, dep habarlaıdy QazAqparat tilshisi.
«Úkimettiń tapsyrmasy boıynsha KEGOC kompanııasy zańnama talaptaryna sáıkes JEK elektr energııasyn biryńǵaı satyp alýshy – «JEK qoldaý jónindegi esep aıyrysý-qarjy ortalyǵy» JShS (QEO) qurdy, ol 2014 jyldan bastap ózine júktelgen barlyq fýnktsııalardy oryndaı otyryp, tabysty jumys istep keledi. Ótken ýaqyt ishinde KEGOC pen ortalyqtyń úılesimdi jumysynyń arqasynda JEK-ti qoldaý júıesi óziniń ómirsheńdigin dáleldedi. Atap aıtqanda, kompanııa usynǵan jobalaý aýktsıondary 2019 jáne 2020 jylǵy aýktsıondarda da óziniń tıimdiligin rastady, JEK elektr energııasynyń rekordtyq tómen baǵalary alyndy. Jalpy alǵanda, ortalyqtyń jalpy belgilengen qýaty 2 835 MVt bolatyn 134 RRA shartyn jasasty», - dedi Baqytjan Qajıev Úkimet otyrysynda.
Onyń aıtýynsha, 2020 jyldyń qorytyndysy boıynsha QEO arqyly elektr energııasyn ótkizetin jumys istep turǵan JEK stantsııalarynyń sany jalpy belgilengen qýaty 1 570 MVt bolatyn 72 nysandy qurady.
«Bul rette JEK nysandarynyń elektr energııasyn óndirýdiń ósýi údemeli qarqynmen júrip jatyr. 2020 jyldyń qorytyndysy boıynsha ekijaqty sharttardy eseptemegende, JEK obektileriniń tek qana QEO arqyly elektr energııasyn óndirýi 2,5 mlrd kVtsaǵ qurady. Al 2025 jylǵa qaraı 8 mlrd kVtsaǵ-tan astam deńgeıdi quraıdy dep josparlanǵan», - dedi kompanııa basshysy.
Onyń sózine qaraǵanda, JEK úlesiniń ósýi eldiń energııa júıesi jumysynyń turaqtylyǵy men senimdiligin qamtamasyz etý turǵysynan jańa talaptar qoıady. Osyǵan baılanysty, 2030 jylǵa deıingi jalpy óndiristiń 10 paıyzyn JEK úlesine qol jetkizý boıynsha Úkimettiń qoıylǵan maqsattaryna qol jetkizý úshin, Energetıka mınıstrligi KEGOC-pen birlesip Qazaqstannyń energııa júıesin jańǵyrtý boıynsha mindetterdiń tutas keshenin júzege asyryp jatyr.
«Bul birinshi kezekte, jańa manevrlik qýattar salý, energııa júıesin tsıfrlandyrý, teńgerimdeýshi naryqty engizý, energııa jınaqtaý júıesin damytý, energııa júıesiniń jumysyn boljaý jáne modeldeý arqyly Qazaqstan biryńǵaı energııa júıesin óndirýshi qýattar qurylymyn dıversıfıkatsııalaý bolyp otyr. Jańa manevrlik elektr stantsııalaryn salý máseleleri 2020 jylǵy jeltoqsanda qabyldanǵan «Elektr energetıkasy týraly» Zańǵa tıisinshe túzetýler engizýdiń arqasynda óz sheshimin tabýda. Qazirgi ýaqytta Energetıka mınıstrliginiń basshylyǵy manevrlik generatsııalaý obektilerin ornalastyrý josparyn daıyndaý jáne jańa gaz stantsııalaryn salýǵa aýktsıondar uıymdastyrý boıynsha jumystar júrgizip jatyr. Kelesi jyly Qazaqstannyń ońtústiginde jańa manevrlik stantsııalardyń qurylysy bastalady dep kútilýde. Bul óz kezeginde jańa jańartylatyn energııa kózderi qurylysyn jedeldetýge múmkindik beredi», - dedi Baqytjan Qajıev.
