Qazaqstanda jańa Konstıtýtsııaǵa sáıkes 18 zańǵa ózgeris engizilip jatyr — Aıda Balaeva
ASTANA. KAZINFORM — Qazaqstanda jańa Konstıtýtsııany iske asyrý aıasynda Ulttyq arhıv qory jáne arhıvter, qoǵamdyq keńester jáne aqparatqa qol jetkizý máseleleri boıynsha úsh zańǵa ózgerister engizildi. Sonymen qatar Konstıtýtsııa talaptaryna sáıkestendirý úshin taǵy 18 zańǵa túzetýler ázirlenip jatyr. Bul týraly Premer-mınıstrdiń orynbasary — mádenıet jáne aqparat mınıstri Aıda Balaeva Úkimet otyrysynda málim etti.
Onyń aıtýynsha, ázirlenip jatqan zańnamalyq ózgerister sóz bostandyǵy men aqparat taratý, dinı uıymdardyń qyzmeti, beıbit jınalystar ótkizý, volonterlik qyzmetti qoldaý, qaıyrymdylyq, mádenıet, kınematografııa jáne Konstıtýtsııadan týyndaıtyn ózge de salalardy qamtıdy.
Sonymen qatar spıker «Qazaqstan Halyq Keńesi týraly» Konstıtýtsııalyq zańnyń qabyldanýyna baılanysty «Qazaqstan halqy Assambleıasy týraly» zańnyń kúshi joıyldy dep atap ótti.
— Osyǵan baılanysty keshe «Qazaqstannyń Halyq Keńesi» Hatshylyǵyn qurý týraly Prezıdent Jarlyǵyna qol qoıyldy. Sonymen qatar birqatar zańnamalyq túzetýler paketi ázirlendi. Onyń aıasynda alǵash ret «etnomádenı birlestikter» uǵymy zańnamalyq deńgeıde bekitilip, dostyq úıleriniń quqyqtyq mártebesi men olardy qarjylandyrý tártibi aıqyndaldy, — dedi Aıda Balaeva.
Mınıstrdiń sózinshe, Qazaqstan halqy Assambleıasynyń tarıhı mıssııasynyń aıaqtalýyna baılanysty etnosaralyq qatynastar men qoǵamdyq kelisimdi damytýdyń jańa tujyrymdamasy ázirlenip jatyr. Sondaı-aq jańa Konstıtýtsııada Qazaqstan tarıhynda alǵash ret zııatkerlik menshikke konstıtýtsııalyq kepildik berildi.
— Bul kreatıvti ekonomıkany damytý úshin asa mańyzdy. Óıtkeni zııatkerlik menshik — kreatıvti ekonomıkanyń negizgi irgetasy. Ol avtorlar, sýretshiler, dızaınerler, kınematografıster jáne kreatıvti ındýstrııa ókilderiniń shyǵarmashylyq eńbegin quqyqtyq qorǵaýǵa qosymsha kepildik beredi, — dedi mınıstr.
Aıda Balaeva jańa Konstıtýtsııada alǵash ret volonterlik qyzmetti kótermeleý normasy bekitilgenin atap ótti. Onyń aıtýynsha, Prezıdent tapsyrmasy boıynsha volonterlik qozǵalysty damytý tujyrymdamasy men ekologııalyq volonterlikti damytý baǵdarlamasy ázirlenip jatyr.
— Naqtyraq aıtsaq, volonterlik qyzmetti tsıfrlyq esepke alý jáne rastaý júıesin damytý, «Shapaǵat» memlekettik medalimen marapattaý kezinde volonterlik qyzmetti eskerý, jumysqa ornalasý barysynda volonterlik ótildi nazarǵa alý, tótenshe jaǵdaılardyń saldaryn joıýǵa qatysatyn volonterlerdiń ómiri men densaýlyǵyn saqtandyrý tetigin engizý jáne basqa da qoldaý sharalary josparlanýda, — dep túıindedi mınıstr.
Buǵan deıin Premer-mınıstr barlyq memlekettik jáne qoǵamdyq ınstıtýttardy túbegeıli jańǵyrtý bastalǵanyn aıtqan edi.
