Qazaqstanda jańa Konstıtýtsııaǵa arnalǵan ǵylymı-praktıkalyq konferentsııa uıymdastyryldy
ASTANA. KAZINFORM — Búgin, ıaǵnı 30 maýsymda Qazaqstan Respýblıkasynyń Konstıtýtsııalyq Soty jańa Qazaqstan Respýblıkasy Konstıtýtsııasynyń kúshine enýine oraılastyrylǵan «Jańa Konstıtýtsııa: ornyqty damýdyń ınstıtýtsıonaldyq jáne quqyqtyq negizi» atty ǵylymı-praktıkalyq konferentsııa ótkizdi. Bul týraly Sottyń baspasóz qyzmeti málim etti.
Konferentsııa jumysyna memlekettik organdar, Parlament, sot júıesi, advokatýra, halyqaralyq uıymdar, ǵylymı jáne sarapshylyq qoǵamdastyq ókilderi, sondaı-aq elimizdiń jáne sheteldiń jetekshi joǵary oqý oryndarynyń ǵalymdary men sarapshylary qatysyp, 150-den astam adam kýá boldy.
Qazaqstan Respýblıkasy Konstıtýtsııalyq Sotynyń Tóraǵasy Elvıra Azımova konferentsııany ashyp, 2026 jylǵy 15 naýryzda respýblıkalyq referendýmda qabyldanǵan Qazaqstan Respýblıkasy Konstıtýtsııasynyń 2026 jylǵy 1 shildeden bastap kúshine enetinine toqtalyp ótti.
Elvıra Azımova óz sózinde «Qazaqstan halqynyń erik bildirýimen elimizdiń konstıtýtsııalyq damýynda jańa kezeńniń negizi qalandy. Bul quqyqtyq júıeni, memlekettik basqarýdy jáne adam quqyqtary men bostandyqtaryn qorǵaý tetikterin odan ári jetildirýdiń strategııalyq baǵdarlaryn aıqyndap berdi.
Jańa Konstıtýtsııanyń qoldanysqa engizilýimen Konstıtýtsııalyq Sot Ata Zańnyń ústemdigin qamtamasyz etip, konstıtýtsııalyq qundylyqtardy qorǵaýdy odan ári nyǵaıtady. Bul Qazaqstannyń tarıhı ári quqyqtyq damýynyń jańa kezeńiniń bastaýyn bildiredi» dep atap ótti.
— Birikken Ulttar Uıymynyń Qazaqstan Respýblıkasyndaǵy Turaqty úılestirýshisi Radnaragcha Sarango men Azııadaǵy ózara is-qımyl jáne senim sharalary keńesiniń Bas hatshysy Qaırat Sarybaı konferentsııa qatysýshylaryna óz quttyqtaýlaryn beınetúsirilim arqyly jetkizip, Qazaqstanda júrgizilgen konstıtýtsııalyq reformalardyń quqyqtyq ınstıtýttardy nyǵaıtý jáne ornyqty damý úshin óte mańyzdy bolǵany jaıynda óz oılarymen bólisti, — delingen habarlamada.
Sonymen qatar, Túrki memleketteri Parlamenttik assambleıasynyń Bas hatshysy Ramıl Gasan men Ózbekstan Respýblıkasy Olıı Majlısiniń Adam quqyqtary jónindegi ýákili Ferýza Eshmatova da qatysýshylardy beınetúsirilim formatynda quttyqtady. Olar Qazaqstandaǵy konstıtýtsııalyq ózgeristerge óńirlik jáne halyqaralyq deńgeıde joǵary qyzyǵýshylyq bar ekenin atap ótti.
Taqyryptyq pikir almasý barysynda qatysýshylar jańa Konstıtýtsııanyń quqyqtyq júıeni damytýdaǵy jáne konstıtýtsııalyq memlekettilikti nyǵaıtýdaǵy rólin talqylady. Zań aldynda jurttyń báriniń teń bolýy, sot tóreligine qoljetimdilik, zańnamany jetildirý, qoǵamdyq kelisimdi nyǵaıtý máselelerine erekshe nazar aýdaryldy. Adam quqyqtaryn qorǵaý aıasyndaǵy qazirgi zamanǵy syn-qaterler, tsıfrlyq quqyqtardy damytý, quqyqtyq mádenıet deńgeıin kóterý jáne quqyqtyq aqparatqa qoljetimdilikti keńeıtý máseleleri de talqylaýǵa ózek boldy. Qazaqstan Respýblıkasynyń Konstıtýtsııasyna ǵylymı kommentarıı ázirleý de talqylandy.
Konferentsııada jetekshi qazaqstandyq ǵalymdar, Konstıtýtsııalyq Sottyń, Konstıtýtsııalyq komıssııanyń, joǵary oqý oryndarynyń jáne sarapshylyq ınstıtýttardyń ókilderi baıandama jasady. Beınetúsirilim formatynda Tehas ýnıversıtetiniń professory Rıchard Albert pen Frantsııa halyqaralyq qatynastar ınstıtýtynyń (IFRI) atqarýshy tóraǵasy Terrı de Monbrıal halyqaralyq perspektıva jaıynda oılaryn bildirip, Qazaqstandaǵy konstıtýtsııalyq reformalardyń demokratııalyq ınstıtýttardy, quqyq ústemdigin nyǵaıtýdaǵy jáne ornyqty damýdy qamtamasyz etýdegi mańyzdylyǵyn erekshe atap ótti.
Ata Zańymyzdyń mátinine barsha azamattyń teń qol jetkizýin qamtamasyz etý maqsatynda Úkimet bastama kóterip, «Inklıýzıvti qoǵam úshin Konstıtýtsııa» aıasynda basyp shyǵarylǵan Braıl qarpindegi Qazaqstan Respýblıkasy Konstıtýtsııasynyń da tanystyrylymy osy konferentsııaǵa tuspa-tus keldi.
Іs-shara barysynda Qazaqstan Respýblıkasy Konstıtýtsııalyq Sotynyń Tóraǵasy Elvıra Azımova men «Qazposhta» AQ Basqarma tóraǵasy Bekejan Jákeev Qazaqstan Respýblıkasy jańa Konstıtýtsııasynyń kúshine enýine arnaıy daıyndalǵan poshta markasyna mór basý rásimine qatysty.
Qatysýshylar konferentsııany qorytyndylaı kele, jańa Konstıtýtsııanyń Qazaqstan damýyndaǵy jańa kezeńniń berik ınstıtýtsıonaldyq jáne quqyqtyq negizine aınalǵanyn atap ótti.
